ئەمریکا سزای دیکە بەسەر کەشتیگەلی سەر بە ئێراندا دەسەپێنێت

ئاڤا نیوز

وەزارەتی گەنجینەی ئەمریکا پاکێجێکی نوێی سزاکانی بۆ سەر ئێران ڕاگەیاند و ڕاستەوخۆ 29 کەشتی و ئەو کۆمپانیایانەی بەڕێوەیان دەبەن دەکاتە ئامانج. 

ڕاگەیێنراوی فەرمی: وەزارەتی گەنجینەی ئەمریکا ڕایگەیاند ئەم کەشتیانە بەشێکن لەو کەشتیگەلەی کە ئێران بۆ تێپەڕاندنی سزاکان و هەناردەکردنی نایاسایی نەوت و بەرهەمە پترۆکیمیاییەکان بەکاریان دەهێنێت. دەشڵێت ئەمە هەنگاوێکی نوێیە بۆ بڕینی شادەمارە داراییەکانی ئێران.

ئەوەی پێویستە بیزانیت: بەپێی ڕاگەیەندراوەکە، ئەو کەشتی و کۆمپانیایانەی سزا دراون بەهاکەیان دەگاتە سەدان ملیۆن دۆلار.

ئەمەش بزانە: ئاژانسی ڕۆیتەرز ئاماژەی بەوە کردووە کە لە نێو لیستی سزادراوەکاندا، ناوی بازرگانێکی میسری بە ناوی "حاتەم سەقر" هەیە. کۆمپانیاکانی ئەم بازرگانە پەیوەندییان بە حەوت لەو کەشتییە سزادراوانە و چەند کۆمپانیایەکی دیکەی گواستنەوەوە هەیە.

باکگراوند: ئەم هەنگاوەی ئەمریکا لە چوارچێوەی سیاسەتی ئەوپەڕی گوشارە بۆ سەر ئێران، تاوەکو ڕێ لە گەیشتنی داهاتی نەوت بە دەستی تاران بگرێت کە واشنتن پێیوایە بۆ چالاکییە ناسەقامگیرکەرەکانی ناوچەکە بەکاری دەهێنێت.