مەرجی نوێ بۆ هاوردەكردنی ئۆتۆمبێل دادەنرێت، هاوردەكردنی ماتۆڕسکیل قورس كراوە

ئاڤا نیوز

وەزارەتی ناوخۆ ڕێنمایی نوێ وەك مەرجەكانی سەلامەتی بۆ تۆماركردنی ئۆتۆمبێل و ماتۆڕسكیلی هاوردەكراو بۆ هەرێمی كوردستان بڵاودەكاتەوە. كاتی قەدەغەكردنی هاوردەكردنی ئۆتۆمبێلی مۆدێل بەرز لە مانگی یازدەوە كراوەتە مانگی نۆ، مەرجی هاوردەكردنی ماتۆڕسكیلیش قورس كراوە.

نووسراوی فەرمی: نووسراوێکی فەرمیی وەزارەتی ناوخۆ كە وێنەیەكی دەست ئاڤا میدیا كەوتووە، بەپێی ڕێنمایی ژمارە 14ـی ساڵی 2025، ئاماژە بە كۆنووسی هاوبەشی حكومەتی هەرێمی كوردستان و حكومەتی فیدراڵی عێراق، تایبەت بە یەكخستنی ڕێنمایی مەرجەكانی سەلامەتیی ئۆتۆمبێلی هاوردەكراو، لەمەودوا قەدەغەكردنی هاوردەكردنی ساڵانەی ئۆتۆمبێل دوو مانگ پێش دەخرێت؛ واتە لەجیاتی 1-11ـەوە، لە 1-9ـەوە هاوردەكردنی ئۆتۆمبێلی مۆدێلی خوار سێ ساڵ، قەدەغە دەكرێن. هاوكات هاوردەكردنی ماتۆڕسكیلی دوو تایە و سێ تایە، تا چوار ساڵی داهاتوو قەدەغەیە، ماتۆڕی جۆری توك توكیش هاوردەكردنی بەهەموو جۆرێك قەدەغەیە.

مەرجە گشتییەكان بۆ هاوردەكردنی ئۆتۆمبێل چەند هەموارێكی بەسەردا كراوە و ئێستا مەرجەكان بەمشێوەیەن:

٠ شانسی بڕاوە نەبێت.

٠ ژێرئاوکەوتوو و سووتاو نەبێت.

٠ بڕوانامەی (COC) هەبێت لەو وڵاتەی كە لێی هاوردە كراوە یاخود لە وڵاتی دروستكەری ئۆتۆمبێلەكە یاخود لەلایەن كۆمپانیاكانی كوالێتی كۆنترۆڵ لە دەروازە سنوورییەكانی هەرێمی كوردستان و عێراق.

٠ ئۆتۆمبێلی ساڵۆن، ستەیشن، بارهەڵگر (1 تۆن و 2 تۆن و 3 تۆن) و کرێ کە ژمارەی سەرنشینیان لە 25 سەرنشین كەمترە، پێویستە لانیكەم دوو "ئێرباگ"ـی هەبێت (كوشنی شوفێر و تەنیشت شوفێر) و مەرجە ئێرباگی نەتەقیبێت و کاریش بکات.

٠ ئامێری (ABS)ـی هەبێت و کار بکات.

٠ دەبێت ئەگزۆزی ئۆتۆمبێلەکە سندوقی (CATALYTIC CONVERTER)ـی تێدابێت بۆ کەمکردنەوەی پیسبوونی ژینگە.

٠ سیستەمی (ABS) یاخود سیستمی برێكی هاوشێوەی هەبێت بۆ ئۆتۆمبێلی بارهەڵگر لە (4) تۆن زیاتر و مەرجە کاریش بکات. بەڵام ئۆتۆمبێلی نەفەرهەڵگر لە (25) سەرنشین زیاتر و بارهەڵگر لە (4) تۆن زیاتر و کشتوکاڵی و بیناسازی مەرج نییە ئێرباگی هەبێت.

٠ ئۆتۆمبێلی ستێرنی لای راست یان (محەوەر- ئەوانەی سوكانی لەلای ڕاستە) هاوردەکردنی قەدەغەیە و تۆمار ناکرێت.

٠ ئۆتۆمبێلی جۆری تاکسی (ساڵۆن) سفر کیلۆمەتر هاوردە دەکرێت بە مەرجێک هەمان ڕەنگی ڕێگەپێدراو و کارپێکراو بێت لە کوردستان و بەپێی ڕێنمایی تۆمارکردنی تاکسی نوێ ژمارە (3)ـی ساڵی 2025 دەکرێت بە تاکسی.

٠ ئۆتۆمبێلی بەکارهاتوو بۆ (پۆلیس و تاکسی) هاوردەکردنی قەدەغەیە و تۆمار ناکرێت.

٠ ئۆتۆمبێلی هاوردەکراوی تەواو کارەبایی و خانەی سووتەمەنی و هایبرێد لە پێدانی ڕەسمی گومرگی لە چوارچێوەی مۆدێلی رێگەپێدراو بەخشراون.

زانیاریی زیاتر: لە بەشێكی دیكەی ڕێنماییە نوێیەكان، هاوردەكردنی ماتۆڕسكیلی دوو تایە و سێ تایە، تا چوار ساڵی داهاتوو قەدەغەیە، ماتۆڕی جۆری توك توكیش هاوردەكردنی بەهەموو جۆرێك قەدەغەیە.

دەربارەی كۆمپانیاكانی دیلیڤەری و پۆست، ئەوانەی لەلایەن وەزارەتی گواستنەوە و گەیاندن مۆڵەتی فەرمییان هەیە، دەتوانن ماتۆڕی دوو تایە و كارەبایی و مۆدێڵی ساڵ هاوردە بكەن.