ئەنجوومەنی وەزیرانی عێراق لەسەر دۆسیەی دارایی هەرێمی کوردستان کۆدەبێتەوە

ئاڤا نیوز

بڕیارە ڕۆژی سێشەممە، ئەنجوومەنی وەزیرانی عێراق کۆببێتەوە و یەکێک لە بڕگە سەرەکییەکانی کارنامەی کۆبوونەوەکەش تایبەت بێت بە پابەندییە داراییەکانی نێوان هەولێر و بەغدا، دوو بەرپرسی کورد زانیاریی لەوبارەیەوە دەخەنەڕوو.

چیرۆکی سەرەکی: دوو تەوەرەی سەرەکی لەم کۆبوونەوەیەدا باس دەکرێن؛ یەکەمیان درێژکردنەوەی ڕێککەوتننامەی هەناردەکردنەوەی نەوتی کوردستانە کە لە 31ی ئەم مانگەدا کۆتایی دێت، دووەمیشیان ناوەڕۆکی ڕاپۆرتی دیوانی چاودێریی دارایی عێراقە لەسەر خەرجی و داهاتەکانی هەرێمی کوردستان.

بەدواداچوونی ئاڤا: بەپێی بەدواداچوونەکانی ئاڤا نیوز بۆ ئەم پرسە، دوو ڕای جیاواز لە نێوان بەرپرسانی کورد لە بەغدا هەیە:

- پرسی نەوت و شایستەکان: بەرپرسێکی باڵای کورد لە بەغدا دەڵێت، کۆبوونەوەکە بۆ تاوتوێکردنی درێژکردنەوەی ڕێککەوتنی هەناردەکردنی نەوتە، کە ئەمە پەیوەستە بە ناردنی شایستە داراییەکانی هەرێمی کوردستان و بڕی 120 ملیار دیناری خەرجییەکانی بەرهەمهێنانی نەوت.

- ڕاپۆرتی وردبینیی دارایی: بەرپرسێکی دیکەی ئاگاداری دۆسیەی مووچە، ئاماژە بەوە دەکات بابەتەکە تایبەتە بە ڕاپۆرتی دیوانی چاودێریی دارایی عێراق. دوای ئەوەی شاندێکی دیوانەکە بۆ ماوەی هەفتەیەک لە هەولێر بوون و وردبینییان لە داهات و خەرجییەکان کردووە، ئێستا کاتی ئەوەیە ئەنجوومەنی وەزیران ناوەڕۆکی ڕاپۆرتەکە و چارەسەری گرفتە تەکنیکییەکان تاوتوێ بکات.

لەلایەکی دیکەوە: دەنگۆیەک بڵاوبووەتەوە کە لەم کۆبوونەوەیەدا بڕیاری ناردنی مووچەی مانگی 10 دەدرێت، سەرچاوەیەکی ئاگادار لەوبارەیەوە بە ئاڤا نیوز ڕاگەیاند: ناردنی مووچە پێویستی بە بڕیاری ئەنجوومەنی وەزیران نییە.

- لەبەر ئەوەی ئێستا حکومەتی عێراق لە قۆناغی کاربەڕێکردندایە، ناردنی مووچە ڕاستەوخۆ لە دەسەڵاتی تەیف سامی، وەزیری دارایی عێراقە.

باکگراوند: مانگی ڕابردوو گرژییەکی تەکنیکی لەنێوان هەولێر و بەغدا لەسەر سەردانی تیمی چاودێریی دارایی دروست بوو، بەڵام بە نووسراوی فەرمی کێشەکە چارەسەر کرا و تیمەکە کارەکانی خۆیان لە هەرێمی کوردستان تەواو کردووە. کۆبوونەوەی ئەم سێشەممەیە دەبێتە وێستگەیەک بۆ بڕیاردان لەسەر قۆناغی داهاتووی پەیوەندییە داراییەکان.