یەکەمین پاڵەوانێتیی ماتۆڕسواریی ژنان لە کرماشان بەڕێوەچوو

ئاڤا نیوز

بۆ یەکەمجار لەسەر ئاستی ئێران، شاری کرماشان لە ڕۆژهەڵاتی کوردستان میوانداریی خولێکی پاڵەوانێتیی ماتۆڕسواریی بۆ ژنان کرد، بەڵام کێبڕکێکە بە ڕووداوێکی دەگمەن کۆتایی هات.

چیرۆکی سەرەکی: لەم پاڵەوانێتییەدا 70 ماتۆڕسوار لە 15 پارێزگای جیاوازی ئێرانەوە بەشدارییان کردبوو، بەڵام ئەوەی بووە جێی باسی میدیاکان و تۆڕە کۆمەڵایەتییەکان، سەختیی کێبڕکێکە بوو.

ئەوەی ڕوویدا: کێبڕکێکە بە جۆرێک پڕبووە لە ئاستەنگ، کە ماتۆڕسوارەکان یەک لە دوای یەک لە نیوەی ڕێگەدا دەکەوتن. لە کۆی ئەو 70 ماتۆڕسوارەی بەشدارییان کردبوو، تەنیا یەک ماتۆڕسوار توانی بەسەر ئاستەنگەکاندا زاڵ بێت و تاوەکو هێڵی کۆتایی بڕوات.

زانیاریی زیاتر: ئەمە یەکەمین خولی پاڵەوانێتیی ماتۆڕسواریی ژنانە کە لە کرماشان لەو ئاستەدا بەڕێوە دەچێت. کەوتنی بەردەوامی بەشداربووەکان و نەگەیشتنیان بە کۆتایی، مشتومڕی زۆری دروست کردووە و دیمەنەکانی لەنێو بەکارهێنەرانی تۆڕە کۆمەڵایەتییەکاندا دەنگدانەوەی هەبووە.