نێچیرڤان بارزانی و مەزڵووم عەبدی لە هەولێر تاوتوێ ڕێککەوتنی نێوان هەسەدە و دیمەشق دەکەن

ئاڤا نیوز

نێچیرڤان بارزانی، سەرۆکی هەرێمی کوردستان لەگەڵ مەزڵووم عەبدی، فەرماندەی گشتیی هەسەدە کۆبووەوە بۆ تاوتوێکردنی ڕێککەوتنی نێوان دیمەشق و هەسەدە و ئایندەی سووریا.

چیرۆکی سەرەکی: ئێواره‌ى ئه‌مڕۆ پێنجشه‌ممه‌ 2026/2/5 بەڕێز نێچیرڤان بارزانی، سەرۆکی هەرێمی کوردستان، پێشوازيی لە بەڕێز مەزڵووم عەبدی، فەرماندەی هێزەکانی سووریای دیموکرات (هەسەدە) و شاندێكى ياوه‌رى کرد.

زانیاریی زیاتر: لە کۆبوونەوەیەکدا، دوایین پێشهاته‌ مەیدانی و سیاسییەکانی دۆخی سووریا، پرسی کورد لەو وڵاتە و ڕێككه‌وتنى حكوومه‌تى سووريا و هه‌سه‌ده‌ تاوتوێ کران.

ڕاگەیێنراوی فەرمی: سەرۆکایەتی هەرێمی کوردستان بڵاویکردەوە: نێچيرڤان بارزانى پشتگیریی هەرێمی کوردستانی بۆ چارەسەری ئاشتییانەی کێشەکان دووپات کردەوە و جەختی لە گرنگیی بەردەوامیی دیالۆگی نێوان لایەنەکان و پاراستنى مافی هەموو پێکهاتەکان و گەلی کورد لە چوارچێوەی سووریایەکی یەکگرتوودا كرده‌وه‌.

لەلایەکی دیکەوە: هەر لە کۆبوونەوەکەدا مەزڵووم عەبدی پوختەیەکی دەربارەی دۆخی ناوچەکە و گفتوگۆکانی لەگەڵ دیمەشق و لایەنە نێودەوڵەتییەکان خستە ڕوو، هەروەها سوپاس و پێزانینی بۆ ڕۆڵی بەردەوامی سەرۆک نێچیرڤان بارزانی و هەرێمی کوردستان دەربڕی بۆ پشتیوانیکردنی مافە ڕەواکانی گەلی کورد و هەوڵەکانيان بۆ هێورکردنەوەی ئاڵۆزییەکان.

ئەوەی پێویستە بیزانیت: بڕیارە سبەی هەینی 6-2-2026، جان نۆێڵ بارۆ، وەزیری دەرەوەی فەڕەنسا لەگەڵ مەزڵووم عەبدی کۆببێتەوە بۆ تاوتوێکردنی وردەکارییەکانی ڕێککەوتنی دیمەشق و هەسەدە و جێبەجێکردنی گەرەنتییەکان.