باندێکی فێڵباز لە هەولێر؛ لە ڕێگەی تەکنیکێکی نوێوە پارەی دووکانداران دەبەن

ئاڤا نیوز

باندێکی ڕێکخراو لە شاری هەولێر، لە ڕێگەی فێڵێکی نوێ و سیناریۆیەکی داڕێژراوەوە، ملیۆنێک و 620 هەزار دیناری دووکاندارێکیان برد و بێسەروشوێن بوون.

چیرۆکی سەرەکی: باندەکە بە شێوازێکی زۆر ورد کار دەکەن؛ بە جۆرێک خۆیان هەم "فرۆشیار" و هەم "کڕیار" بوون بۆ ئەوەی متمانەی دووکاندارەکە بەدەستبهێنن و دواتر بڕە پارەیەکی گەورەی لێ وەربگرن.

چیرۆکەکە چۆن دەستیپێکرد؟: کاک کامیل عەباس، دووکاندارێکە لە گەڕەکی سێتاقانی هەولێر، چیرۆکەکەی بۆ ئاڤا نیوز بەمجۆرە گێڕایەوە:

- کەسێک بەناوی مەندووبی هەنگوین تەلەفۆنی بۆ دەکات و چوار کیلۆ هەنگوینی بە قیست (کەی فرۆشتت پارەکەی بدە) بۆ دەنێرێت.

- دوای تەنیا دوو کاتژمێر، کڕیارێک دەچێتە دووکانەکە و هەموو هەنگوینەکە دەکڕێت و دەڵێت "ئەمە زۆر ئەسڵە، ئەگەر هەبێت هەموویم دەوێت.

فێڵە گەورەکە: دووکاندارەکە تەلەفۆن بۆ مەندووبەکە دەکاتەوە بۆ داواکردنی بڕی زیاتر. مەندووبەکە دەڵێت 46 کیلۆ هەنگوین و 21 کیلۆ سرکەم ماوە، بەڵام چونکە منداڵم نەخۆشە و دەیبەم بۆ ئێران، دەبێت "کاش" پارەکەم بدەیتێ.

- کاک کامیل بەهۆی ئەوەی کڕیاری حازری هەبووە، متمانە دەکات و بڕی یەک ملیۆن و 620 هەزار دینار دەداتە شۆفێری تاکسییەک و بارەکە وەردەگرێت، بەڵام دواتر دەردەکەوێت: تەلەفۆنی کڕیار، مەندووب و شۆفێری تاکسییەکە هەمووی داخراون.

- ئەو هەنگوینەی کیلۆی بە 30 هەزار دابوویێ، بەرهەمێکی کوالیتی نزمە و پێنج هەزار دیناریش ناکات.

لێدوانی فەرمی: موقەدەم کیفاح حەسەن، گوتەبێژی پۆلیسی هەولێر ڕایگەیاند: پێویستە ئەو دووکاندارە بەزوویی سەردانی بنکەی پۆلیس بکات و سکاڵا تۆمار بکات. لای خۆمانەوە لە ڕێگەی کامێراکانی چاودێری و بەڵگەکانەوە، بەدوای ئەندامانی باندەکەدا دەگەڕێین بۆ ئەوەی ڕووبەڕووی یاسایان بکەینەوە.