عەبدولڕەزاق شەمسەدین، هونەرمەندی ناوداری هەولێر تووشی ڕووداوی شێلان بوو

ئاڤا نیوز

عەبدولڕەزاق شەمسەدین، ئەکتەری ناسراوی شاری هەولێر، لە کاتی پەڕینەوەی لە شەقامێک تووشی ڕووداوی هاتووچۆ بوو و بەهۆیەوە ڕەوانەی نەخۆشخانە کرا.

چیرۆکی سەرەکی: پێشنیوەڕۆی ئەمڕۆ یەکشەممە 21-12-2025، لە شەقامی سەرەکیی گرووپی ئەندازیاران لە نزیك کەسنەزان، ئۆتۆمبێلێک خۆی کێشا بە هونەرمەند عەبدولڕەزاق شەمسەدین و بەو هۆیەوە بریندار بوو.

لێدوانی فەرمی: ڕزگار عەبدولڕەزاق، کوڕی هونەرمەندەکە بە ئاڤا نیوزی ڕاگەیاند: باوکم ماوەیەک بوو بەهۆی نەخۆشییەوە لە ماڵەوە بوو، ئەمڕۆ کە هەستی کردووە تەندروستی باشترە، ویستوویەتی بچێتە دەرەوە بۆ پیاسەیەک.

- لە کاتی پەڕینەوەی لە شەقام، ئۆتۆمبێل لێی داوە؛ ئێستا لە نەخۆشخانەیە و چارەسەر وەردەگرێت.

- خۆشبەختانە تەندروستی جێگیرە، هەرچەندە ئازار لە سەر و قاچەکانیدا هەیە، بەڵام مەترسی لەسەر ژیانی نییە.

باکگراوند: عەبدولڕەزاق شەمسەدین، یەکێکە لە ئەکتەرە دێرینەکانی هەولێر، لە ساڵی 1954 لە گەڕەکی خانەقا لەدایکبووە. لە ساڵی 1970 بە درامای "فاڵچی" دەستی بە کاری هونەری کردووە و بەشداریی لە دەیان دراما و شانۆی وەک (مارەیی، چڵپاو، پێچە ڕەش، کەوەکانی قەرەچووغ، سێدارە و دراوسێ) کردووە.