فیلمی بەرازیلییە شینەکە لە ژمارەیەک پلاتفۆرمی جیهانی دادەنرێت

ئاڤا نیوز

فیلمی سینەمایی بەرازیلییە شینەکە، لە ژمارەیەک پلاتفۆرم و سەکۆی جیهانی تایبەت بە فیلمی سینەمایی دادەنرێت.

چیرۆکی سەرەکی: فیلمی سینەمایی بەرازیلییە شینەکە لە دەرهێنانی محەممەد شێروانی، نووسین و بەرهەمهێنانی داروین وەیس، بەرهەمی کۆمپانیای ئارت سیتی و سینە کوردە، فیلمەکە باس لە چیرۆکی ڕاستەقینەی پێشتری شاری هەولێر دەکات، ئەم فیلمە یەکێکە لەو فیلمە سینەماییانەی لە هەرێمی کوردستان بینەرێکی زۆری هەبووە.

لێدوانی فەرمی: داروین وەیس، نووسەر و بەرهەمهێنەری فیلمی بەرازیلیە شینەکە، بە ئاڤای گوت: فیلمی سینەمایی بەرازیلییە شینەکە، لە سەکۆکانی Apple TV و Amazon Prime Video و Youtube Movies و Google Tv بڵاودەکرێتەوە، ئەمەش ساتێکی گرنگ و گەورەی کولتووری و نەتەوەییە و دەرگای چوونە ناو سیستەمی جیهانیی دیجیتاڵ بۆ سینەمای کوردی دەکاتەوە. 

بۆچی گرنگە: دانانی فیلمێکی سینەمایی کوردی کە لەلایەن کۆمپانیایەکی کوردی بەرهەمهێنراوە، لە چەند ڕووێکەوە گرنگی زۆری هەیە:

٠ دانانی فیلم لەم پلاتفۆرمانە بەڵگەی ئەوەیە فیلمەکە بە ستانداردی جیهانی بەرهەمهێنراوە.

٠ فیلمەکەکە لەلایەن تیمێکی پرۆفیشنال تەماشای دەکرێت و ڕێژەی تەمەنی بۆ دیار دەکرێت.

٠ فیلمەکە لە هەڵسەنگاندنی کوالێتی و مەرجەکانی ئەو پلاتفۆرمانە دەردەچێت ئینجا پەسەند دەکرێت.

٠ ئەم پلاتفۆرمانە دەرگایەکی بازرگانی گەورەتر بۆ کۆمپانیاکان و بەرهەمهێنەرانی فیلم دەکاتەوە، چونکە لە رێگەی ئەم پلاتفۆرمانە فیلمە کوردییەکان بینەری زیاتریان دەبێت.