دایکانی کرماشان گۆرانیی "هەنارە" بڵاو دەکەنەوە

ئاڤا نیوز

گرووپی دایکانی کرماشان بەبۆنەی شەوی یەڵداوە، بەرهەمێکی نوێی هونەرییان بە ناوی "هەنارە" بۆ زیندووکردنەوەی کولتووری کوردی بڵاو کردەوە.

چیرۆکی سەرەکی: ئازیتا ئیبراهیمی، گۆرانیبێژ و سەرپەرشتیاری گرووپەکە ڤیدیۆیەکی تایبەتی بۆ ئاڤا میدیا ناردووە و دەڵێت: "ئامانجمان لە بەرهەمهێنانی ئەم گۆرانییە بۆ دایکان ئەوەیە کە هەست بە تەنیایی نەکەن، دڵخۆش بن و زیاتر باوەڕیان بە تواناکانی خۆیان هەبێت".

ئەوەی پێویستە بیزانیت: شەوی یەڵدا لە ڕۆژهەڵاتی کوردستان بایەخێکی زۆری پێ دەدرێت و دوای جەژنی نەورۆز، بە یەکێک لە بۆنە گرنگەکان دادەنرێت. ئەم بەرهەمە هونەرییەش وەک ئامادەکارییەک دێت بۆ پێشوازیکردن لەو شەوە.

زانیاریی زیاتر: گرووپەکە دەیەوێت لە ڕێگەی ئەم ڤیدیۆکلیپەوە، جگە لە لایەنە هونەرییەکە، جوانیی جلوبەرگی کوردی و ڕەسەنایەتیی کولتووری کوردەواری بە نەوەکانی ئێستا بناسێنێت.