تابلۆیەک بە چوار ملیۆن دۆلار؛ گرانترین ژمارەی ئۆتۆمبێل لە هەولێرە

ئاڤا نیوز 

لە شاری هەولێر، گرانترین ژمارەی ئۆتۆمبێل لەسەر ئاستی عێراق تۆمار کراوە؛ تابلۆیەک کە نرخی کڕین و فرۆشتنی، چەندین هێندەی نرخی خودی ئۆتۆمبێلەکە تێدەپەڕێنێت.

چیرۆکی سەرەکی: تابلۆکە تەنیا ژمارەی (2)ـە و لەسەر ئۆتۆمبێلێکی جۆری (ڕۆڵس ڕایس) مۆدێل 2026 بەستراوە. ئەم ئۆتۆمبێلە لە جیهاندا تەنیا 80 دانەی لێ بەرهەم هێنراوە و لە تەواوی عێراقدا تەنیا ئەم دانەیە هەیە کە لە هەولێرە.

ژمارەکان وادەڵێن: نرخی ئۆتۆمبێلەکە: نزیکەی یەک ملیۆن دۆلارە. نرخی تابلۆکە: نزیکەی چوار ملیۆن دۆلارە.

- خاوەنەکەی پێشتر ڕەقەمەکەی بە ملیۆنێک و 750 هەزار دۆلار کڕیوە، بەڵام ئێستا ئامادە نییە بە چوار ملیۆن دۆلاریش بیفرۆشێت.

ئەوەی پێویستە بیزانیت: دوای ئەوەی سیستمی تابلۆی ئۆتۆمبێل گۆڕدرا و کۆدی هەولێر بووە (22)، ژمارەی (2) بەهایەکی مادیی زۆر زیاتری پەیدا کرد، چونکە تابلۆکە دەبێتە (22 | 2)، ئەمەش خولیایەکی گەورەی لای بازرگانان و ئارەزوومەندانی ژمارەی نایاب دروست کردووە.

زانیاریی پەیامنێر: بەپێی بەدواداچوونی پەیامنێری ئاڤا و گفتوگۆ لەگەڵ بازرگانانی تابلۆی ئۆتۆمبێل، خەڵکانی ناوەڕاست و باشووری عێراق خولیایەکی بێوێنەیان بۆ ژمارەی تاک و نایاب هەیە. شارەزایان پێشبینی دەکەن ئەگەر تابلۆکە بخرێتە بازاڕەوە، کڕیارانی بەغدا و شارەکانی دیکە ئامادەن تاوەکو شەش ملیۆن دۆلار (600 دەفتەر) بۆ کڕینی تەرخان بکەن.