لە ڕانیە پرۆژەیەكی جیاوازی كشتوكاڵی دەكرێتەوە؛ دەیان هەلی كار دەڕەخسێنێت

ئاڤا نیوز

لە ڕانیە پرۆژەیەكی گرنگ بۆ بەرهەمە كیمیایی و ئۆرگانیە كشتوكاڵییەكان كرایەوە كە بە هاوبەشی لەنێوان وەبەرهێنەرانی ناوخۆیی و بیانی بۆ بەرهەمهێنانی ماددە قڕكەرەكان بونیادنراوە و دەیان دەرفەتی كار بۆ دەرچووانی كۆلێژی كشتوكاڵ دەڕەخسێنێت.

چیرۆکی سەرەکی: لەچوارچێوەی بایەخ پێدانی كابینەی نۆیەمی حكومەتی هەرێمی كوردستان بە وەبەرهێنان و پرۆژە بەرهەمهێنەرەكان، پرۆژەی 'پلانت ئێنێرجی' لە ڕانیە بۆ بەرهەمی كیمیایی و ماددە قڕكەرە كشتوكاڵییەكان، بە تێچووی سێ ملیار دینار جێبەجێ كراوە و وەزارەتی كارو كاروباری كۆمەڵایەتیش بڕی 150 ملیۆن دیناری لەچوارچێوەی پرۆژەی گەشانەوە بۆ پاڵپشتیی پرۆژەكە دابین كردووە.

بۆچی گرنگە: كارگەكە سەرەڕای ئەوەی بەرهەمی كیمیایی قڕكەرەكان بە كوالێتی بەرز و نرخی هەرزان بۆ جووتیاران دەستەبەر دەكات، دەرفەتی كاریش بۆ ژمارەیەك دەرچووی كۆلێژ و پەیمانگەی كشتوكاڵی دەڕەخسێنێت بەپێی تایبەتمەندی و پسپۆڕیی دەرچووان.

لێدوانی فەرمی: بێگەرد تاڵەبانی، وەزیری كشتوكاڵ و سەرچاوەكانی ئاوی هەرێمی كوردستان ڕایگەیاند، بەرهەمەكانی كارگەی 'پلانت ئێنێرجی'، جگە لە پێداویستی ناوخۆیی، بۆ ناوچەكانی دیكەی هەرێمی كوردستان و عێراقیش هەناردە دەكرێت.

دووپاتیشی كردەوە، جووتیارانمان دەتوانن پشت بە بەرهەمەكانی ئەو كارگەیە ببەستن و لەكاتی كێڵانی زەوییەكانیان بەكاریبهێنن، بەو پێیەی بە كوالێتی بەرز بەرهەمدەهێنرێن.

بابەتە ستراتیژییەكە: وەزیری كشتوكاڵ ئاماژەی بەوەشكرد، هەوڵەكانی وەزارەت بە ئاراستەی كەمكردنەوەی هاوردەی بەرهەمی دەرەوە و زیادكردنی بەرهەمی باوەڕپێكراوی خۆماڵین، لەو چوارچێوەیەشدا بەڵێنی هەماهەنگی و پاڵپشتی بۆ فراوانكردنی كارگەكە و بەكارخستنی سەرجەم بەشە تەواوكارییەكانی دەدەین لەڕێگەی دابینكردنی زەویی زیاتر بۆ پرۆژەكە كە دەبێتە هۆی بەرزكردنەوەی ئاستی بەرهەمهێنانی كارگەكە.