ئیسرائیل هەڕەشەکانی بۆ سەر ئێران تووندتر دەکات

ئاڤا نیوز

ئییال زەمیر، سەرۆک ئەرکانی سوپای ئیسرائیل لە لێدوانێکی توونددا هۆشداری دەداتە تاران و ڕایدەگەیێنێت، وڵاتەکەی درێژە بە هێرشەکانی دەدات لە دژی هەموو ئەو شوێنانەی مەترسی بۆ سەر ئاسایشی ئیسرائیل دروست دەکەن.

لێدوانی فەرمی: ئییال زەمیر، لە میانی مەراسمی دەستاودەستکردنی پۆستی سەرۆکی بەشی پلاندانان لە سوپای ئیسرائیل، ئێرانی وەک نەیاری سەرەکیی وڵاتەکەی ناوبرد و ڕایگەیاند: لەنێو جەرگەی ئەم شەڕە درێژخایەن و ئاڵۆزەدا، هەڵمەتێکی چڕمان دژی ئێران دەستپێکردووە.

- ئێران پشتیوانیی دارایی و سەربازیی ئەو گرووپانە دەکات کە لە دەوروبەری ئیسرائیل جێگیربوون و پلانی لەناوبردنی وڵاتەکەمانیان هەیە.

-بەردەوام دەبین لە وەشاندنی گورزەکانمان لە هەر شوێنێک بە پێویستی بزانین، جا چ لە بەرە نزیکەکان بێت یان لە بەرە دوورەکان."

بۆچوونی لایەنی بەرامبەر: ئێران ئامادەیی خۆی بۆ هەر ڕووبەڕبوونەوەیەک نیشان دەدات. ئەحمەد وەحیدی، جێگری سەرۆکی ئەرکانی گشتیی هێزە چەکدارەکانی ئێران ڕایگەیاند: ئێمە بۆ گەڕێکی دیکەی ڕووبەڕبوونەوە لەگەڵ ئیسرائیل ئامادەین.

"پڕۆسەی بەرهەمهێنانی چەک و تەقەمەنیمان تەنانەت بۆ ساتێکیش ڕانەوەستاوە."

زانیاریی زیاتر: ئەم لێدوانە تووندانەی سەرۆک ئەرکانی سوپای ئیسرائیل لە کاتێکدایە کە ئاڵۆزییەکانی نێوان تێل ئەڤیڤ و تاران گەیشتوونەتە ئاستێکی بێپێشینە. ئیسرائیل دەیەوێت ئەو پەیامە بگەیێنێت کە سڵ لە بەئامانجگرتنی بەرژەوەندییەکانی ئێران لە ناوچەکەدا ناکاتەوە.

باکگراوند: ململانێی نێوان ئیسرائیل و ئێران لە چەند مانگی ڕابردوودا لە شەڕی "سێبەر" و ڕووبەڕبوونەوەی ناڕاستەوخۆوە، گۆڕاوە بۆ لێدانی ڕاستەوخۆی یەکتر، ئەمەش ترسی لای کۆمەڵگەی نێودەوڵەتی دروست کردووە کە ناوچەکە بەرەو جەنگێکی گشتگیر هەنگاو بنێت.