ئەمریکا داوا لە هاووڵاتییانی دەکات بەپەلە ئێران جێ بهێڵن

ئاڤا نیوز

وەزارەتی دەرەوەی ئەمریکا لە ڕاگەیەندراوێکی بەپەلەدا، هۆشداری دەداتە هاووڵاتییانی وڵاتەکەی کە هەرچی زووە خاکی ئێران جێ بهێڵن.

ڕاگەیێنراوی فەرمی: باڵیۆزخانەی مەجازیی ئەمریکا کە سەر بە وەزارەتی دەرەوەی ئەمریکایە، چەند هۆکارێکی سەرەکیی بۆ ئەم بڕیارە لەناکاوە دیاری کردووە؛ لەوانە پچڕانی هێڵەکانی ئینتەرنێت و سنووردارکردنی پەیوەندییەکان، هەڵوەشاندنەوەی بەردەوامی گەشتە ئاسمانییەکان بۆ دەرەوەی وڵات، داخرانی ڕێگاوبانەکان و تێکچوونی دۆخی گواستنەوە.

زانیاریی زیاتر: باڵیۆزخانەکە ئامۆژگاریی هاووڵاتییانی کردووە کە باشترە لە ڕێگەی وشکانییەوە بەرەو وڵاتانی ئەرمینیا و تورکیا گەشت بکەن و ئێران جێ بهێڵن؛ هەروەها دەڵێت نابێت بەرەو ناوچە سنوورییەکانی نێوان ئێران لەگەڵ عێراق، پاکستان و ئەفغانستان بڕۆن.

٠ لە ڕاگەیەندراوەکەدا ئاماژە بەوە کراوە کە ئەو کەسانەی هەردوو ڕەگەزنامەی "ئێرانی و ئەمریکی"یان هەیە، پێویستە لە کاتی چوونە دەرەوەیاندا پاسپۆرتی ئێرانی بەکار بهێنن، چونکە تاران بە فەرمی دان بە دوو ڕەگەزنامەییدا نانێت و وەک هاووڵاتیی ئێرانی مامەڵەیان لەگەڵ دەکات.

لەلایەکی دیکەوە: ئەم هۆشدارییە کە ئەمڕۆ هەینی، 2026-2-6 بڵاو کراوەتەوە، تەنیا چەند کاتژمێرێک پێش دەستپێکردنی کۆبوونەوەی نێوان ئێران و ئەمریکایە لە مەسقەتی پایتەختی عومان، کە بڕیارە عەباس عێراقچی، وەزیری دەرەوەی ئێران، لەگەڵ ستیڤ ویتکۆف، نوێنەری تایبەتی دۆناڵد ترەمپ و جارید کۆشنەر، ڕاوێژکاری ترەمپ، سەبارەت بە پرسی ئەتۆمیی ئێران کۆ ببنەوە.