لە کەرکووک خۆپیشاندانە و ڕێگایەکی سەرەکی داخرا

ئاڤا نیوز

دانیشتووانی گەڕەکی کوردستان لە کەرکووک خۆپیشاندانیان کردووە ڕێگای سەرەکی نێوان کەرکووک - دووبزیان داخستووە.

هۆکارە زانراوەکان: ماوەی دوو ڕۆژە کارەبای نیشتیمانی لەو گەڕەکە نییە، بەهۆیەوە دانیشتووانی گەڕەکەکە نیگەران بوونە و ڕژاونەتە سەر شەقام و ئاگریان کردووەتەوە، داوا دەکەن هەرچی زووە کارەبای نیشتیمانی بە گەڕەکەکەیان بدرێتەوە.

زانیاریی زیاتر: هێزە ئەمنییەکان گەیشتوونەتە شوێنی خۆپیشاندەران بۆئەوەی کۆنترۆڵی توڕەیی خەڵک بکەن و کۆتایی بە خۆپیشاندانەکە بهێنن.

دانیشتووانی گەڕەکی کوردستان خەڵکێکی هەژارنشینن، بە ئاڤایان گووت خۆمان بەبێ خاوەن دەزانین، جیاکاری زۆر دەکرێت لەنێوان گەڕەکە کوردنشینەکان لەگەڵ گەڕەکانی دیکەی شاری کەرکووک.

زانیاریی بەدەستهاتوو: بەشداربوویەکی خۆپیشاندانەکە بە ئاڤای گوت، هیچ ئومێدێکمان بە حکومەتی عێراق نییە کە خزمەتمان بکات، داوای لە ئاڤا کرد هەروەک چۆن لە چەمچەماڵ بوونە مینبەری دەنگی خەڵک، ئاوا دەنگی ئێمەش بگەیەنن و چارەسەری کێشەی بێ کارەبایی گەڕەکەکەمان بکەن.

چارەسەرەکان: دەربارەی بێ کارەبایی گەڕەکی کوردستانی شاری کەرکووک، دانیشتووێکی گەڕەکەکە ئەمڕۆ پەیوەندی بە یاریدەدەری پارێزگاری کەرکووک کردووە، یاریدەدەری پارێزگار پێیگووتووە دەبێت پەرلەمانی عێراق بوودجە پەسەند بکات ئینجا کێشەی ئێوە چارەسەر دەکرێت.