لە هەولێر پاتری لە گەدەی منداڵێکی سێ ساڵان دەرهێنرا؛ گلۆپەکەی هێشتا داگیرساو بوو

ئاڤا نیوز

لە یەکێک لە نەخۆشخانە تایبەتەکانی شاری هەولێر، پزیشکان توانییان بەبێ نەشتەرگەری و لە ڕێگەی "نازوور"ـەوە، پاترییەکی قووتدراو لە گەدەی منداڵێکی سێ ساڵان دەربهێنن.

چیرۆکی سەرەکی: ئەمڕۆ یەکشەممە 21-12-2025، منداڵێکی تەمەن سێ ساڵان لە کاتی یاریکردن بە پاترییەک (پیل)، پاترییەکەی خستووەتە دەمی. کاتێک دایکی ویستوویەتی لە دەمی دەربهێنێت، منداڵەکە گریاوە و بەو هۆیەوە پاترییەکەی قووت داوە.

لێدوانی فەرمی: دکتۆر بڵند سیروان عەبدوڵڵا، پسپۆڕی وردی هەرس و جگەر لە نەخۆشخانەی CMC، کە پڕۆسەی دەرهێنانی پاترییەکەی ئەنجامداوە، بە ئاڤا نیوزی ڕاگەیاند: "پاترییەکە گلۆپێکی بچووکی پێوە بووە و ئیشی کردووە، تەنانەت ئەو کاتەی لە ڕێگەی نازوورەوە لەناو گەدەی منداڵەکە دەمانهێنا، گلۆپەکە هەر بە داگیرساوی مابووەوە."

- پزیشکەکە ئاماژەی بەوە کرد کە ئەنجامدانی ئەم پڕۆسەیە بە "نازوور" لە جیاتی نەشتەرگەری، وایکردووە منداڵەکە کاتێکی کەمتر لە نەخۆشخانە بمێنێتەوە و تووشی ئازار و شوێنەواری نەشتەرگەری نەبێت. دوای پڕۆسەکەش منداڵەکە بە تەندروستییەکی باشەوە ڕەوانەی ماڵەوە کراوەتەوە.

پەیامێک بۆ دایکان و باوکان: پزیشکان هۆشداری دەدەن کە یاریکردنی منداڵ بە پاتری و شتی ورد مەترسییەکی گەورەیە، چونکە ماددە کیمیاییەکانی ناو پاتری ئەگەر بۆ ماوەیەکی زۆر لەناو گەدەدا بمێننەوە، دەبنە هۆی سووتانی ناوپۆشی گەدە و دروستکردنی کێشەی تەندروستیی مەترسیدار.