ئاڤا بەدواداچوون بۆ دواکەوتنی ئیکرامییەی خانەنشینانی ئاسایش دەکات

ئاڤا نیوز

دوای ئەوەی ژمارەیەک لە خانەنشینانی ئاسایش لە هەولێر گلەیی دواکەوتنی ئیکرامییەکانیان گەیاندە ئاڤا نیوز، بەڕێوەبەرایەتیی گشتیی خانەنشین ڕوونکردنەوە دەدات و ڕایدەگەیەنێت، خەرجکردنی بەشێکی ئیکرامییەکانیان دەکەوێتە ساڵی داهاتوو.

چیرۆکی سەرەکی: لە ساڵی 2024دا، ژمارەیەکی زۆر لە ئەفسەر و کارمەندانی هێزەکانی ئاسایش خانەنشین کران، بەڵام تاوەکو ئێستا تەواوی شایستەی ئیکرامییەکەیان وەرنەگرتووە. ئەو خانەنشینانە لە ڕێگەی ئاڤا میدیاوە داوا دەکەن بەدواداچوون بۆ هۆکاری دواکەوتنی پارەکەیان بکرێت.

زانیاریی تایبەت: سەرچاوەیەکی ئاگادار لە بەڕێوەبەرایەتیی گشتیی خانەنشینی هەرێمی کوردستان بە ئاڤای ڕاگەیاند: "سەرجەم ئەو خانەنشینانە ئیکرامییەی شەش مانگیان وەرگرتووە، بەڵام ئیکرامییەی 12 مانگەکەیان ماوە؛ بەپێی یاسای خانەنشینی یەکگرتووی عێراق، دەبێت بەغدا ئەو بڕە پارەیە خەرج بکات و تاوەکو ئێستاش بۆ کەس خەرج نەکراوە."

لەلایەکی دیکەوە: بەڕێوەبەرایەتیی گشتیی خانەنشینی هەرێمی کوردستان دڵنیایی دەدات کە بەغدا بە فەرمی ڕەزامەندی لەسەر خەرجکردنی ئەو شایستەیە دەربڕیوە، بەڵام بەهۆی تەواونەبوونی ڕێکارەکان، خەرجکردنی ئیکرامییەی 12 مانگەکە دەکەوێتە ساڵی داهاتوو.

ئەوەی پێویستە بیزانیت: لە ڕێکەوتی 1-7-2024ـەوە، یاسای خانەنشینی یەکگرتووی عێراق لە هەرێمی کوردستان چووەتە بواری جێبەجێکردنەوە، ئەمەش گۆڕانکاریی لە میکانیزمی خەرجکردنی شایستە داراییەکانی خانەنشینان دروست کردووە.

ئەمەش بزانە: بەهۆی کاراکردنی یاسای خانەنشینی عێراق لە ساڵی 2024دا، سەرجەم ئەو کارمەندانەی تەمەنیان لە نێوان 60 بۆ 63 ساڵدا بوو (لەدایکبووانی 1961 تا 1964)، بە یەکەوە خانەنشین کران، کە پێشتر لە هەرێمی کوردستان بەو تەمەنە خانەنشین نەدەکران.