شاندی باڵای پارتی لە بەغدایە؛ پرسی سەرۆکی پەرلەمان و پێکهێنانی حکومەت تاوتوێ دەکرێن

ئاڤا نیوز

شاندێکی باڵای پارتی دیموکراتی کوردستان بە مەبەستی ئەنجامدانی زنجیرەیەک کۆبوونەوەی سیاسی گەیشتنە بەغدا؛ بڕیارە دوو ڕۆژ لە پایتەخت بمێننەوە و لەگەڵ سەرکردە باڵاکانی عێراق کۆببنەوە.

وێنە گەورەکە: ئەم سەردانە لە کاتێکدایە کە سەرۆککۆماری عێراق ڕۆژی 29ی ئەم مانگەی وەک وادەی دانیشتنی پەرلەمان بۆ هەڵبژاردنی سەرۆک و دوو جێگرەکەی دیاری کردووە. لایەنەکان و بەتایبەتی پێکهاتەی سوننە گفتوگۆکانیان چڕکردووەتەوە، پارتیش دەیەوێت لەم کۆبوونەوانەدا پرسی پێکهێنانی حکومەتی نوێ و پشکی کورد لە پۆستەکان یەکلا بکاتەوە.

زانیاریی پەیامنێر: دەروون مەلا ناجی، پەیامنێری ئاڤا لە بەغدا ڕایگەیاند: "پێشنیوەڕۆی ئەمڕۆ سێشەممە، شاندی دانوستانکاری پارتی کۆبوونەوەکانیان دەستپێدەکەن. یەکەم وێستگەیان کۆبوونەوە دەبێت لەگەڵ لەتیف ڕەشید، سەرۆککۆماری عێراق؛ بڕیاریشە هەر ئەمڕۆ چاویان بە محەممەد شیاع سوودانی و نووری مالیکی بکەوێت."

زانیاریی زیاتر: شاندەکە بە سەرۆکایەتیی فازڵ میرانییە و ئەندامانی بریتین لە (د. فوئاد حوسێن، د. ئومێد سەباح، نەوزاد هادی و فارس عیسا). جگە لە دانیشتنی پەرلەمان، پرسی شایستە داراییەکانی هەرێمی کوردستان و چوارچێوەی کارەکانی حکومەتی داهاتوو تەوەرێکی سەرەکیی گفتوگۆکانیان دەبێت.