مەسرور بارزانی: دەبێت حکومەتی نوێی عێراق لەسەر بنەمای هاوبەشی، هاوسەنگی و سازان بێت

ئاڤا نیوز 

مەسرور بارزانی، سەرۆکوەزیرانی هەرێمی کوردستان، پێشوازیی لە سەرۆکی هاوپەیمانیی سیادە کرد و لە دیدارێکدا دۆخی گشتیی عێراق و هەوڵەکان بۆ پێکهێنانی کابینەی نوێی حکومەتیان تاوتوێ کرد.

ڕاگەیێنراوی فەرمی: سەرۆکوەزیرانی هەرێمی کوردستان لە هەژماری تایبەتیی خۆی لە تۆڕی کۆمەڵایەتیی فەیسبووک ڕایگەیاند: "ئەمڕۆ سێشەممە، 23-12-2025، لەگەڵ سەرمەد خەمیس خەنجەر، سەرۆکی هاوپەیمانیی سیادە، دۆخی گشتیی عێراق و گفتوگۆی لایەنە سیاسییەکانمان بۆ پێکهێنانی کابینەی نوێی حکومەت تاوتوێ کرد."

- لە دیدارەکەدا جەخت لەوە کرایەوە کە پێویستە لە پێکهێنانی حکومەتی نوێدا، پڕەنسیپەکانی هاوبەشی، هاوسەنگی و سازان لەبەرچاو بگیرێن. هەردوولا هاوڕابوون کە دەبێت حکومەتی داهاتوو بێ جیاوازی خزمەتی سەرجەم هاووڵاتییانی عێراق و گشت پێکهاتەکان بکات.

باکگراوند: ڕێکارە یاساییەکانی یەکەم دانیشتنی پەرلەمانی عێراق لە خولی نوێدا تەواو کراون؛ لایەنە سیاسییەکانی سوننە و شیعە بۆ گەیشتن بە ڕێککەوتنی کۆتایی و پێکهێنانی کابینەی نوێ، لە سەردانیکردنیان بۆ هەولێر بەردەوامن.