دەوڵەتی یاسا دەستپێشخەریی سوودانی لەبارەی سەرۆکوەزیرانی داهاتوو ڕەت دەکاتەوە

ئاڤا نیوز

دەوڵەتی یاسا دەستپێشخەریی محەممەد شیاع سوودانی، لەبارەی دیاریکردنی کاندیدی سەرۆکوەزیرانی نوێ ڕەت دەکاتەوە و جەخت لەوە دەکاتەوە، سەرکردەکانی چوارچێوەی هەماهەنگی دژی نوێ کردنەوەی ویلایەتی سوودانین و سوورن لەسەر کاندیدکردنی نووری مالیکی.

 

ئەوەی پێویستە بیزانیت: هاوپەیمانییەکەی سوودانی دەسپێشخەرییەکی بۆ یەکلاکردنەوەی کاندیدی سەرۆکوەزیران پێشنیاز کردووە، کە پشت بە تەوافوق و دیاریکردنی پێوەر بۆ هەڵبژاردنی کاندیدەکە دەبەستێت، گرنگترینیان شارەزایی جێبەجێکردن و قبووڵکراوی نیشتمانی بوو، لەگەڵ پێشنیارکردنی بژاردەیەکی جێگرەوە کە پشت بە "سەنگی هەڵبژاردن" دەبەستێت ئەگەر تەوافوق نەکرا، بە مەبەستی کۆتاییهێنان بە چەقبەستوویی سیاسی و یەکلاکردنەوەی دۆسیەی سەرۆکوەزیران لە چوارچێوەی کاتە دەستوورییەکاندا.  

 

لێدوانی فەرمی: ئیبتیسام هیلالی، پەرلەمانتاری هاوپەیمانیی دەوڵەتی یاسا، بە میدیای عێراقی ڕایگەیاند، هاوپەیمانێتییەکەیان دەستپێشخەریی سوودانی ڕەت دەکاتەوە، چونکە بە "هەوڵێک بۆ بەدەستهێنانی ویلایەتی دووەم"ی دادەنێن.

 

-سەرکردەکانی چوارچێوەی هەماهەنگی بە چەند هۆکارێک دژی نوێ کردنەوەی ویلایەتی سوودانین، لەوانەش "بڕیارە نادروستەکان و تێکچوونی دۆخی ئابووری."

 

لەهەمان کاتدا: هیلالی دووپاتی کردەوە "ئێمە لە دەوڵەتی یاسا سوورین لەسەر کاندیدکردنی نووری مالیکی بۆ پۆستی سەرۆکوەزیرانی داهاتوو،" کە "پشتیوانی و پشتگیری لایەنە کوردی و سوننەکانی هەیە بۆ وەرگرتنی ئەو پۆستە."

 

هەنگاو داهاتوو: هیلالی گوتیشی "چوارچێوەی هەماهەنگی، کاندیدی خۆی بۆ پۆستی سەرۆکوەزیران دوای بەڕێوەچوونی یەکەم دانیشتنی ئەنجوومەنی نوێنەران و هەڵبژاردنی سەرۆکی پەرلەمان و دوو جێگرەکەی یەکلا دەکاتەوە."