لە سنووری ڕاپەڕین؛ مین بە شوانێکدا تەقییەوە

ئاڤا نیوز 

سەرلەبەیانیی ئەمڕۆ لە سنووری شاخەکانی ناحیەی بێتواتە لە ئیدارەی ڕاپەڕین، مینێکی چێندراو بە شوانێکدا تەقییەوە؛ بەو هۆیەوە شوانەکە بریندار بوو و ڕەوانەی نەخۆشخانە کرا.

چیرۆکی سەرەکی: بەیانیی ئەمڕۆ سێشەممە، لە دامێنی چیای شیشار لە ناحیەی بێتواتە، شوانێک کە سەرقاڵی لەوەڕاندنی ئاژەڵەکانی بووە، مینێکی پێدا تەقیوەتەوە و بە سەختی برینداری کردووە.

لێدوانی فەرمی: تەها محەممەد، گوتەبێژی تەندروستیی گشتیی ڕاپەڕین بە ئاڤای ڕاگەیاند: "بەیانیی ئەمڕۆ گەنجێکی تەمەن 25 ساڵان گەیێنراوەتە نەخۆشخانەی فێرکاریی ڕانیە، کە ئاسەواری ساچمەی مین بە جەستەیەوە دیار بووە. گەنجەکە هەموو چارەسەرێکی پێویستی بۆ کراوە و لە ژێر چاودێریی پزیشکیدایە؛ باری تەندروستیی تا ڕادەیەک جێگیرە."

ئەمەش بزانە: ئەو گەنجەی بریندار بووە خێزاندارە و نیشتەجێی سنووری ناحیەی بێتواتەیە.

باکگراوند: ئەم ڕووداوە لە کاتێکدایە کە تەنیا 2 ڕۆژ لەمەوبەر لە سنووری گوندی گرتک لە قەزای پشدەر، مین بە مێگەلە بزنێکدا تەقییەوە و بووە هۆی مرداربوونی 16 سەر بزن. هێشتا بەشێک لە چیاکانی سنووری ئیدارەی ڕاپەڕین لە مینە چێندراوەکانی سەردەمی ڕژێمی بەعس پاک نەکراونەتەوە و مەترسیی بەردەوامیان بۆ سەر ژیانی هاووڵاتییان هەیە.