نزیکەی سێ ملیۆن دۆنم زەوی لە هەرێمی کوردستان بە گەنم دادەچێنرێت

ئاڤا نیوز

ڕووبەری داچاندنی گەنم لە هەرێمی کوردستان زیاد دەکرێت، وتەبێژی وەزارەتی کشتووکاڵ لەوبارەوە دەڵێت: "بەراورد بە ساڵانی ڕابردوو نیو ملیۆن دۆنم زەوی زیاتر بە گەنم دادەچێنرێت."

 

لێدوانی فەرمی: هیوا عەلی، وتەبێژی وەزارەتی کشتوکاڵی حکومەتی هەرێمی کوردستان بە ئاڤا میدیای وت: بە ڕەچاوکردنی شەپۆلەکانی بارانبارین ئامادەکاریی بۆ وەرزی داچاندن لەلایەن جووتیاران و وەزارەتی کشتوکاڵەوە کراوە، ئەمساڵ ڕێژەی داچاندن بە گەنم زیاد دەبێت.

 

لەلایەکی دیکەوە: وتەبێژی وەزارەتی کشتوكاڵ ئەمانەشی گوت:

 

-ساڵی 2024، نزیکەی دوو ملیۆن و 500 هەزار دۆنم زەوی بە گەنم داچێنرا.

 

-ئەمساڵ بەگوێرەی ئەو پلانەی دانراوە نزیکەی سێ ملیۆن دۆنم زەوی بە گەنم دادەچێنرێت.

 

-ساڵی 2024، بەهۆی کەمیی ڕێژەی بارانبارین  زیانی زۆر بە جووتیاران گەیشت.

 

-پێشبینی دەکەین ئەمساڵ  ئاستی بەرهەمهێنانی گەنم باشتر بێت.

 

-زیاتر لە 75٪ی زەوییە کشتوکاڵییەکان دەیمن.

 

-لە 4-1-2026 بۆ 15-2-2026، دەبێت جووتیاران ئەو فۆرمەی لە بەڕێوەبەرایەتییە کشتوکاڵیەکانی پارێزگا و ئیدارە سەربەخۆکانە پڕی بکەنەوە، بۆئەوەی لە پڕۆسەی بە بازاڕکردنی گەنم بێبەش نەبن.

 

ئەوەی پێویستە بیزانیت: وتەبێژی وەزارەتی کشتوكاڵ گوتیشی: هەر جووتیارێک پێویستە ناوی تەواو، ڕووبەری زەویی بە گەنم داچێنراو و جۆری گەنمەکەی لە فۆرمەکەدا بنووسێت، ئەمە دەبێتە بنەمای دانوستان لەگەڵ وەزارەتەکانی کشتوکاڵ و بازرگانیی عێراق، ئەگەرنا گەنمەکانیان لێ وەرناگیرێت.