ئەنجوومەنی ئاسایش سەبارەت بە ئێران کۆ دەبێتەوە

ئاڤا نیوز

سەرەڕای ناڕەزایەتییەکانی ڕووسیا و چین، کۆبوونەوەی ئەنجوومەنی ئاسایشی نەتەوەیەکگرتووەکان سەبارەت بە بەرنامەی ئەتۆمیی ئێران لە نیویۆرک بەڕێوەچوو.

 

چیرۆکی سەرەکی: لە کۆبوونەوەکەدا واشنتن ئامادەیی دەربڕیوە بۆ کۆبوونەوەی ڕاستەوخۆ لەگەڵ ئێران لەسەر بنەمای سفرکردنی پیتاندنی یۆرانیۆم. 

 

لێدوانی فەرمی: مۆرگان ئورتاگوس، یاریدەدەری نێردەی تایبەتی ترەمپ بۆ ڕۆژهەڵاتی ناوەڕاست و نوێنەری ئەمریکا لە کۆبوونەوەکەی ئەنجوومەنی ئاسایش، ڕایگەیاند ئەمریکا ئامادەی دانوستانە، بەڵام بە مەرجی ئەوەی دانوستانەکان ڕاستەوخۆ و مانادار بن.

 

ئەو گوتیشی ئەمریکا سەبارەت بەم پرسە شەفافە و ئەوەی بەردەوام لەسەری سوورە بریتییە لەوەی کە نابێت لە ناوخۆی ئێران یۆرانیۆم بپیتێنرێت.

 

کاردانەوەکان: ئەمیر سەعید ئیروانی، نوێنەری هەمیشەیی ئێران لە نەتەوەیەکگرتووەکان، لە وەڵامی ئەم قسانەدا ڕایگەیاند: پێشوازی لە هەر دانوستانێکی دادپەروەرانە و مانادار دەکەین، بەڵام پێداگری لەسەر سیاسەتی بەناو پیتاندنی سفر بەتەواوی پێچەوانەی ئەو مافانەیە کە ئێران وەک ئەندامێکی پەیماننامەی قەدەغەکردنی چەکی ئەتۆمی بەدەستی دەهێنێت.