ئیسرائیل کوژرانی بەرپرسی دارایی حەماس لە غەززە ڕادەگەیێنێت

ئاڤا نیوز

سوپای ئیسرائیل کوژرانی عەبدولحەی زەقووت، بەرپرسی بەشی دارایی لە "لیواکانی قەسام"ی باڵی سەربازیی بزووتنەوەی حەماس، لە غەززە ڕادەگەیێنێت.

 

وێنە گەورەکە: سەرەڕای ئاگربەستی نێوان حەماس و ئیسرائیل، هەوڵەکانی ئیسرائیل بۆ لاوازکردنی تواناکانی حەماس، تەنانەت لە کاتی دانوستانەکانیشدا بەردەوامە لە ڕێگەی بە ئامانجگرتنی بەرپرسانی سیاسیی و سەربازی بزووتنەوەکە.

 

بڵاوکراوەی فەرمی: ئەفیخای ئەدەرعی، گوتەبێژی سوپای ئیسرائیل لە هەژماری خۆی "ئێکس" ڕایگەیاند: "لە چالاکییەکی هاوبەشی سوپای ئیسرائیل و دەزگای ئاسایشی گشتی (شاباک)، دوو هەفتە لەمەوبەر، عەبدولحەی زەقووتی سەر بە حەماس لە غەززە کوژراوە".

 

ئەوەی ئێستا ڕوودەدات: بەگوتەی ئەدەرعی، زەقووت لەکاتی بوونی لە ئۆتۆمبێلەکەیدا، شانبەشانی ڕائید سەعد کوژراوە. لە ماوەی ساڵی ڕابردوودا، زەقووت بەرپرسی کۆکردنەوەی دەیان ملیۆن دۆلار و گواستنەوەی بووە بۆ باڵی سەربازیی حەماس.

 

ئەوەی پێویستە بیزانیت: نزیکەی دوو هەفتە لەمەوبەر، سوپای ئیسرائیل ڕایگەیاندبوو کە ڕائید سەعدی کوشتووە، کە یەکێک بووە لە پلاندانەرانی هێرشەکانی 7ی تشرینی یەکەمی 2023.