فەرمانی دەستگیرکردن بۆ پەرلەمانتارێکی سوودانی دەدرێت

ئاڤا نیوز

بەهۆی سوکایەتیکردن بە مەرجەعە ئایینییەکان، فەرمانی دەستگیرکردن بۆ کاندیدێکی دەرچووی هاوپەیمانی ئاوەدانکردنەوە و گەشەپێدان دەردەکرێت.

چیرۆکی سەرەکی: چەند ڕۆژێک لەمەوبەر تۆمارێکی دەنگیی دزەپێکراوی حوسێن عەنکووشی، پەرلەمانتاری هاوپەیمانیەتی سوودانی بڵاوکرایەوە، کە تێیدا بەشێوەیەکی نەشیاو باسی لە عەلی سیستانی مەرجەعی باڵای شیعەکان، موقتەدا سەدر ڕێبەری ڕەوتی سەدر و ئەبو مەهدی موهەندیس کردبوو.

بڵاوکراوەی فەرمی: بەپێی بەڵگەنامەیەک کە ئەمڕۆ 24-12-2024  لە لایەن ئەنجوومەنی باڵای دادوەری بڵاوکراوەتەوە: دادگای کەرخی سێیەم بە تۆمەتی سوکایەتیکردن بە هێما و مەرجەعە ئایینییەکان، فەرمانی دەستگیرکردنی بۆ "حوسێن عەنکووشی"، کاندیدی دەرچووی هاوپەیمانی "ئاوەدانکردنەوە و گەشەپێدان" دەرکرد،

زانیاریی زیاتر: بەپێی زانیارییەکان، سکاڵاکە لەلایەن نوێنەرێکی ڕەوتی سەدرەوە تۆمارکراوە بە تۆمەتی "سوکایەتیکردنی ئاشکرا بە هێما ئایینییەکان". هاوکات "ئەحمەد شەهید" کە ئەویش کاندیدێکی دەرچووی هەڵبژاردنەکانە، سکاڵایەکی یاسایی لە دژی عەنکۆشی بەهەمان تۆمەت تۆمار کردووە.

لەلایەکی دیکەوە: هاوپەیمانی ئاوەدانکردنەوە و گەشەپێدان، ڕاگەیێنراوێکی سەبارەت بەو تۆمارە دەنگییەی پەرلەمانتار حوسێن عەنکووشی بڵاوکردەوە و داوای لە دەسەڵاتی دادوەری کرد ڕێکاری یاسایی بگرێتەبەر .

ئەمەش بزانە: فەرمانی دەستگیرکردنی عەنکووشی بەپێی ئەو ماددە یاساییانە دەرکراوە کە سوکایەتیکردن، هاندان و بێڕێزیی ئاشکرا بەرامبەر بە هێما ئایینییەکان بە تاوان دەناسێنن.