پێشبینی دەکرێت لە ماوەی هەفتەیەکدا هەناردەی غازی ئێران بۆ عێراق دەست پێ بکاتەوە

ئاڤا نیوز

ئەندازیارێک لە وەزارەتی کارەبای عێراق ڕادەگەیێنێت، پێشبینی دەکرێت لە ماوەی هەفتەیەکدا هەناردەی غاز لە ئێرانەوە بۆ عێراق دەست پێ بکاتەوە.

چیرۆکی سەرەکی: بەهۆی دۆخێکی لەناکاو هەناردەی غازی ئێران بۆ عێراق ڕاگیرا و لە ئەنجامدا نزیکەی 4500 مێگاوات کارەبا کەمی کرد، هەوڵەکانیش بۆ دۆزینەوەی وزەی جێگرەوە لە ناوخۆی عێراق بەردەوامن.

ئەوەی لەبارەیەوە دەگوترێت: بەرپرسانی وەزارەتی کارەبا ڕایانگەیاندووە، ئێران کاتێکی دیاریکراوی بۆ دەستپێکردنەوەی هەناردەی غاز دیاری نەکردووە، بەڵام عەلی نووری، ئەندازیار لە وەزارەتەکە، کە قسەی بۆ ئاژانسی هەواڵی ڕۆیتەرز کردووە، دەڵێت: پێشبینی دەکرێت لە ماوەی هەفتەیەکدا هەناردەی غازی ئێران دەستپێبکاتەوە. هاوکات هۆکاری وەستاندنەکەی گەڕاندەوە بۆ زیادبوونی خواست لە لایەنی ئێرانەوە.

ئەوەی پێویستە بیزانیت: عێراق ناچار بوو هەندێک یەکەی بەرهەمهێنانی کارەبا بوەستێنێت و باری سەر هەندێکی دیکە کەمبکاتەوە، دوای وەستانی غازی ئێران کە 30% بۆ 40%ـی پێداویستییەکانی عێراق لە غاز و کارەبا دابین دەکات.

هۆکارە زانراوەکان: لە مانگی ئاداری ڕابردوودا، ئیدارەی دۆناڵد ترامپ، سەرۆک ئەمریکا، ئەو لێخۆشبوونەوەی هەڵوەشاندەوە کە ڕێگەی بە عێراق دەدا لە بەرامبەر کارەبادا پارە بداتە ئێران، ئەمەش وەک بەشێک لە هەڵمەتی "زۆرترین فشار"ـی ترەمپ لەسەر تاران.