ئاڤا کۆبوونەوەیەکی چوارچێوەی هەماهەنگی بە بێ کاندیدەکانی سەرۆکوەزیران ئاشکرا دەکات

ئاڤا نیوز

 

سەرچاوەیەکی سیاسیی ئاگادار ئاشکرای دەکات، لایەنەکانی چوارچێوەی هەماهەنگی کۆبوونەوەیەکی تایبەتیان بەبێ کاندیدە سەرەکییەکانی پۆستی سەرۆکوەزیران ئەنجامداوە و سێ بژاردەیان بۆ یەکلاکردنەوەی پۆستەکە خستووەتە ڕوو.

 

زانیاریی تایبەت: سەرچاوەیەک لە نێو چوارچێوەی هەماهەنگی بە ئاڤا میدیای ڕاگەیاند: کۆبوونەوەیەکی یەکلاکەرەوە ڕۆژی 21ـی ئەم مانگە لە ماڵی هادی عامری بەڕێوەچووە، بەڵام هەریەکە لە نووری مالیکی، محەممەد شیاع سوودانی و حەیدەر عەبادی، سێ کاندیدی دیاری پۆستی سەرۆکوەزیرانی داهاتووی عێراق، ئامادەی ئەو کۆبوونەوەیە نەبوون.

 

- کۆبوونەوەکە سێ بژاردەی سەرەکی بۆ یەکلاکردنەوەی ناوی کاندیدی سەرۆکوەزیرانی دیاری کردووە:

بژاردەی یەکەم:  ئەو سێ کاندیدەی ئاماژەیان پێکراوە (مالیکی، سوودانی و عەبادی) لەنێوان خۆیاندا لەسەر یەک ناو ڕێکبکەون و چوارچێوەی هەماهەنگیش پشتگیری لە بڕیارەکەیان بکات.

بژاردەی دووەم: جگە لەو سێ کاندیدە سەرەکییە، چوارچێوەی هەماهەنگی یەکێک لەو شەش کاندیدەی دیکە هەڵبژێرن کە پێشتر سیڤییان پێشکەش بە چوارچێوەکە کردبوو، ئەوانیش بریتین لە:  قاسم ئەعرەجی، حەمید شەتری، عەلی شوکری، باسم بەدری،  ئەسعەد عیدانی و عەبدولحسێن عەبتان.

 
بژاردەی سێیەم:  پەنابردن بۆ دیاریکردنی کەسایەتییەک لە دەرەوەی ئەو نۆ کاندیدە.

 

زانیاریی زیاتر: هەر بەگوێرەی زانیارییەکانی ئاڤا،  لە ئەگەری بژاردەی دووەمدا، هەر یەکە لە باسم بەدری و عەلی شوکری چانسی بەهێزیان بۆ وەرگرتنی پۆستەکە هەیە، چونکە باسم بەدری، سەر بە دەوڵەتی یاسایە و مالیکی پشتیوانی دەکات ئەگەر خۆی دیاری نەکرێت.

عەلی شوکریش، خەڵکی نەجەفە و پێشتر لەسەر پشکی سەدرییەکان وەزیری پلاندانان بووە و ئیستاش سەرۆکی تیمی ڕاوێژکارانی سەرۆکایەتیی کۆماری عێراقە و فایەق زێدان، سەرۆکی ئەنجوومەنی باڵای دادوەری عێراق پشتیوانی دەکات.

 

ئەمەش بزانە: ئەم کۆبوونەوەیە لە کاتێکدایە، لایەنە سوننەکان تاوەکو ئێستا نەگەیشتوونەتە ڕێککەوتن سەبارەت بەیەکلاکردنەوەی پۆستی سەرۆکی پەرلەمان، هەرچەندە تەنیا چوار ڕۆژ بۆ یەکەم دانیشتنی خولی نوێی پەرلەمان ماوە و پێویستی بەپێی یاسا لەو دانیشتنەدا سەرۆک و جێگرانی سەرۆکی پەرلەمان لەنێو هۆڵی پەرلەمان لەبەغدا هەڵبژێردرێت.