عێراق 11 ملیار یۆرۆ قەرزارە بۆیە ئێران غازی سرووشتی لەسەر گرتووەتەوە

ئاڤا نیوز

 

قەرزەکانی حکومەتی عێراق بەهۆی هاوردەکردنی غازی سرووشتی ئێران گەیشتووەتە 11 ملیار یۆرۆ. بەگوتەی بەرپرسێکی باڵای عێراق هۆکاری ڕاگرتنی هەناردەی غاز لەلایەن ئێران جۆرێکە لە فشار تاوەکوو بەغدا بەشێک لەو قەرزە بداتەوە تاران.

چیرۆکی سەرەکی: ماوەی چەند ڕۆژێکە ئێران غازی سرووشتی لەسەر عێراق گرتووەتەوە، بەم هۆیەوە عێراق چوار هەزار و 500 هەزار مێگاواتی کەم بووەتەوە، دەکاتە نزیکەی سەدا 20ی کارەبای هەموو عێراق.

لە عێراق خۆی پێش کێشەکە 12 کاتژمێر کارەبای نیشتمانی هەبوو، ئێستا بەگشتی بە نزیکەیی دوو کاتژمێر و نیو بۆ سێ کاتژمێر کەمی کردووە، کاریگەرییەکەیشی لەسەر چەند پاریزگایەکە، بەغدا، دیالە، نەجەف و لەوێ کەمبوونەوەی کارەبا گەیشتووتە شەش کاتژمێریش.

 

هۆکارە زانراوەکان: ئەمڕۆ پێنجشەممە ئاڤا بەدواداچوونی کرد هۆکارەیەکی چییە؟ کە زستان دێت ئێران خۆی پێویستی بە غازی زیاترە. هۆکاری دووەم ئەوەیە حکومەتی عێراق پارەی غاز بە ئێران نادات، مانگانە بە بەهای 150 بۆ 200 ملیۆن یۆرۆ غاز لە ئێران دەکڕێت، بەڵام ماوەیەکی زۆرە پارەکەی نەداوە، ئێستا عێراق 11 ملیار یۆرۆ پارەی غاز قەرزاری ئێرانە.

- پارەکە بۆیە بە یۆرۆیە ئەمریکا قبووڵ ناکات ئێران کار بە دۆلار بکات. بۆیەش ئەو هەموو پارەیەی لەسەر کەڵەکە بووە و نەیداوە، ئەمریکا ڕێگە نادات عێراق پارەکە بە ئێران بدات چونکە ئێران لەناو سزاکانی ئەمریکایە. ئەمریکا بەردەوام فشار دەکات عێراق غاز لە ئێران نەکڕێت.

لێدوانی فەرمی: بەرپرسێکی باڵای عێراق بە ئاڤای وت: هۆکاری ڕاگرتنی غاز ئەوەیە، ئێران کارتی فشار بەرامبەر عێراق بەکار دەهێنێت بۆ ئەوەی بەشێک لە پارەکەی پێبدات.

ئەوەی پێشبینی دەکرێت: بڕیارە لە ڕۆژانی داهاتوودا شاندێکی عێراق سەردانی ئێران بکات بۆ چارەسەرکردنی گرفتەکە.