عێراق بەنیازە 50 بەنداوی نوێ دروست بکات؛ ڕێژەیەکی زۆر کەم بۆ  کوردستان تەرخانکراوە

ئاڤا نیوز

وەزارەتی سەرچاوە ئاوییەکانی عێراق لە سەرتاسەری عێراق 50 بەنداو دروست دەكات و ڕێژەیەکی زۆر کەمی بۆ هەرێمی کوردستان تەرخان کردووە.

چیرۆکی سەرەکی: عێراق هەنگاوەکانی بۆ ڕووبەڕووبوونەوەی کێشەی کەمئاوی خێرا دەکات، لە چوارچێوەی دروستکردنی بەنداوەکاندا، پارێزگاکانی هەرێمی کوردستان ڕۆڵێکی کەمیان هەیە؛ بەشێوەیەک لە  دروستکردنی 50 بەنداو سلێمانی یەک بەنداو و دهۆکیش یەک بەنداوی بەردەکەوێت و هەولێریش بێبەش کراوە.

لێدوانی فەرمی: ویسام خەڵەف عوبێد، بەڕێوەبەری گشتیی بەنداو و کۆگاکان ڕایگەیاند: " لە چوارچێوەی ڕێککەوتنێكی ستراتیژیدا ژمارەیەك بەنداو دروست دەكرێن كە ئێستا كاری دیزاینیان تەواو بووە و چاوەڕێی کۆمپانیا تورکییەکان دەکەین بۆ دەستپێکردنی کارەکان، تەنیا دابینکردنی بودجە ماوە بۆ ئەوەی پڕۆژەکان بچنە باری جێبەجێکردنەوە."

شێوازی جێبەجێکردن: بەنداوێك لە سلێمانی و یەكێكیش لە دهۆك و لە کەرکووکیش سێ بەنداو دروست دەكرێن، زۆرترین پشکیش بۆ پارێزگای نەینەوا و ئەنبار تەرخان کراوە، لە نەینەوا 23 بەنداو و لە ئەنباریش 12 بەنداو دروست دەكرێن.

بەشێوەیەکی گشتی لە عێراق ئێستا 24 بەنداو هەن.