هۆشداریی بەپەلە لەبارەی هاتنی شەپۆلی بارانی بەخوڕ و لافاو دەدرێت

ئاڤا نیوز

 

دەستەی کەشناسی عێراق هۆشدارییەکی بەپەلە دەداتە هاووڵاتییان لەبارەی گۆڕانکارییەکانی کەشوهەوا و ڕایدەگەیێنێت، لە شەوی شەممەوە شەپۆلێکی بەهێزی بارانبارین زۆرینەی ناوچەکانی وڵات دەگرێتەوە و مەترسی دروستبوونی لافاویش هەیە.

 

ڕاگەیێنراوی فەرمی: بەگوێرەی ڕاگەیێنراوی دەستەی کەشناسی عێراق، لە نێوەڕۆی ڕۆژی شەممەوە بارانبارین لە زۆرینەی شارەکان دەستپێدەکات، بەڵام لوتکەی کاریگەریی شەپۆلەکە لە شەوی شەممە لەسەر یەکشەممە دەبێت و تا درەنگانی شەوی یەکشەممە بەردەوامی دەبێت.

 

زانیاری زیاتر: لە ڕاگەیێنراوەكەدا هۆشداری دراوە لەبارەی دروستبوونی لافاو لە هەندێک ناوچە، بەتایبەتی لەو شوێنانەی دەکەونە سەر ڕێڕەوی دۆڵەکان، سەبارەت بە ناوچەکانی ناوەڕاست و باشووری عێراقیش، پێشبینی دەکرێت بارانبارینەکە بە شێوەی پچڕپچڕ بێت، بەڵام لە بەرەبەیانی ڕۆژی یەکشەممەدا ئەگەری بارانی بەخوڕ لە ناوچە سنوورییەکانی نێوان عێراق و ئێران هەیە.

 

هۆشداریی زیاتر: پسپۆڕانی کەشناسی داوا لە هاووڵاتییان دەکەن، بەتایبەت ئەوانەی لە ناوچە شاخاوییەکان و نزیک ڕێڕەوی ئاوەکان دەژین، ئامادەکاری پێویست بکەن و لە کاتی گەشتکردن ئاگاداری گۆڕانکارییەکان بن.