چوارچێوەی هەماهەنگی پۆستی جێگری سەرۆکی پەرلەمانیشی بۆ یەکلایی نەکرایەوە

ئاڤا نیوز

 

شەوی ڕابردوو چوارچێوەی هەماهەنگی خاوەن گەورەترین فراکسیۆن لە خولی نوێی پەرلەمانی عێراق، کۆبووەوە و کۆبوونەوەکەشی تایبەت بوو بە یەکلایی کردنەوەی پۆستی جێگری یەکەمی سەرۆکی پەرلەمان، بەڵام کۆبوونەوەکە بەبێ دەرکردنی هیچ بەیاننامەیەک کۆتاییهات و ئەو پۆستەی بەرکەوتەی شیعەکان یەکلایی نەکرایەوە.

 

هۆکارە زانراوەکان: ئەو لایەنەی شیعەکان کە پۆستی جێگری یەکەمی سەرۆکی پەرلەمان وەردەگرێت، مافی وەرگرتنی پۆستی سەرۆکوەزیران و وەزارەتە گرنگەکان لەدەستدەدات، چوارچێوەی هەماهەنگی ئامادەیە ئەو پۆستە بدەنە هاوپەیمانێتییەکەی سوودانی و تەنانەت ئەحمەد ئەسەدی سەرکردەی ئەو هاوپەیمانێتییەش وەک بەهێزترین کاندید ناوی دەهێنرێت، بەڵام لیستەکەی سوودانی کە زۆرترین کورسیشی لەناو چوارچێوەی هەماهەنگیدا هەیە، تائێستاش شەڕ لەسەر وەرگرتنەوەی پۆستی سەرۆکوەزیران دەکات و چاوی لەم پۆستە نییە.

 

زانیاریی زیاتر: شەوی ڕابردوو سەرکردەکانی چوارچێوەی هەماهەنگی شیعەکان لە ماڵی عەممار حەکیم، سەرۆکی ڕەوتی حیکمەی نیشتمانی بە ئامادەبوونی بافڵ تاڵەبانی، سەرۆکی یەکێتی کۆبوونەوە، لە کۆبوونەوەکەدا یەکلایی کردنەوەی کاندیدی سەرۆکوەزیران و کاندیدی هاوپەیمانێتییەکە بۆ پۆستی جێگری یەکەمی سەرۆکی پەرلەمانی عێراق تاوتوێ کراوە.

 

ئەمەش بزانە: کۆبوونەوەکە بەبێ دەرکردنی هیچ ڕاگەیێنراوێک کۆتایی هاتووە، ئەوەش مانای وایە پۆستی جێگری یەکەمی سەرۆکی پەرلەمان یەکلایی نەبووەتەوە کە بۆ کام لایەنی ناو هاوپەیمانێتییەکە دەبێت و ناکۆکی ناوماڵی شیعی لەم بارەیەوە بەردەوامە، بەڵام دەسەڵاتی دادوەریی عێراق هۆشداریی داوەتەوە لایەنەکان کە دەبێت سبەی پۆستەکانی سەرۆکی پەرلەمان و دوو جێگرەکەی یەکلاییبکرێنەوە و دواخستنی ئەم بابەتەی بە پێشێلکردنی دەستوور لە قەڵەم داوە.