خۆپیشاندانی عەلەوییەکان لە سووریا بەڕێوەچوو؛ کوژراو و برینداری لێکەوتەوە

ئاڤا نیوز

هاووڵاتیانی پێکهاتەی عەلەوی لە سووریا دەستیان بە خۆپیشاندان کرد و داوای فیدراڵیزم دەکەن لەئەنجامدا تووندوتیژی لەنێوان ئەوان و هێزە ئەمنییەکان دروست بوو و چەندین کەس لە هەردوولا کوژران و برینداربوون، ئەمەش لە کاتێکدایە حکومەتی سووریا پاشماوەکانی ڕژێمی پێشوو تۆمەتبار دەکات بە دروستکردنی ئاوژاوەگێڕی و هێرشکردنە سەر خەڵک و هێزە ئەمنییەکان.

چیرۆکی سەرەکی: لەسەر بانگەشەی غەزال غەزال، سەرۆکی ئەنجوومەنی باڵای عەلەوییەکان هەزاران هاووڵاتی لە چەندین شار و شارۆچکەی پارێزگاکانی لازقییە، تەرتووس و حومس ڕژانە سەر شەقام و شوێنە گشتییەکان و داوای فیدراڵی و کۆتاییهێنان بە پێشێلکارییەکانی دژیان کرد.

ڕاگەیێنراوی فەرمی: ڕوانگەی سووری بۆ مافەکانی مرۆڤ ڕایگەیاند: هێزە ئەمنییەکان و لایەنگرانی حکومەت هێرشیان کردە سەر خۆپیشاندەران لە شاری لازقییە و چەندین کەسیان بریندار کرد کە بەشێکیان برینەکانیان سەختە. هاوکات بەهەمان شێوە لایەنگرانی حکومەت بە ساتووڕ و چەقۆ هێرشیان کردە سەر خۆپیشاندەرانی شاری جەبلە.

لەلایەکی دیکەوە: ئاسایشی ناوخۆی پارێزگای لازقیە ڕایگەیاند، بەشێک لە ئەندامانی ڕژێمی ئەسەد بەشدارییان لە خۆپیشاندانەکان کردووە و هێرشیان کردووەتە سەر هێزە ئەمنییەکان لە لازقییە و جەبلە، بەهۆیەوە ئەندامێکی ئاسایش لە لازقییە گیانی لەدەستدا و چەند ئەندامێکی دیکە برینداربوون.

ئاسایشی لازقیە ئەوەشی ئاشکرا کرد، چەکدارانی دەمامکدار لەنێو خۆپیشاندانەکانی لازقییە و جەبلە بینراون و کە سەر بە گرووپەکانی بەناو "سەرایەی درعی ساحل" و "سەرایەی جەواد" ـن.

ژمارەکان وادەڵێن: بەڕێوەبەرایەتیی تەندروستیی لازقییە ڕایگەیاند، ئەندامانی پێشووی ڕژێمی بەعسی ڕووخاو هێرشیان کردووە و سێ کەس لە هێزە ئەمنییەکان و هاووڵاتیان کوژراون و 60 کەسی دیکەش برینداربوون.