ئەمریکا بۆ عێراق: نابێت گرووپە چەکدارەکان بەشداری لە حکومەتدا بکەن

ئاڤا نیوز

باڵیۆزخانەی ئەمریکا لە بەغدا، هۆشدارییەکی تووند ئاراستەی لایەنە سیاسییەکان دەکات، کاربەڕێکەری کاروباری باڵیۆزخانەکە دەڵێت "بە هەر ناو و ناونیشانێک نابێت گرووپە چەکدارەکانی سەر بە ئێران بەشداری لە حکومەتی نوێی عێراقدا بکەن."

وێنە گەورەکە: یەکێک لە داواکارییە سەرەکییەکانی ئەمریکا لە عێراق ئەوەیە کە پێویستە گرووپە چەکدارەکان چەکەکانیان دەبنێن و چەک تەنیا لە دەستی دەوڵەت بێت، تا ئێستا بەشێک لە گرووپەکان وەڵامەکانیان ئەرێنی بووە، بەشێکیان هیچ وەڵامێکیان نییە.

لێدوانی فەرمی: جۆشوا هاریس، کاربەڕێکەری کاروباری باڵیۆزخانەی ئەمریکا لە عێراق ڕایگەیاند، بەشداری کردنی ئەو گرووپە چەکدارانە لە حکومەتی نوێی عێراقدا، بەشێوەیەکی ڕاستەوخۆ دژی بونیادنانی هاوبەشییەکی بەهێز و درێژخایەنە لە نێوان بەغدا و واشنتن.

ڕاگەیێنراوی فەرمی: بەگوێرەی ڕاگەیێنراوێکی باڵیۆزخانەی ئەمریکا لە بەغدا، جۆشوا هاریس لەگەڵ عەممار حەکیم، سەرۆکی ڕەوتی حیکمە کۆبووەتەوە، لە کۆبوونەوەکەدا هاریس هۆشداریی دا، بوونی ئەم گرووپانە لەناو جومگەکانی حکومەتدا، نەک هەڕەشە لە سەقامگیری و ئابووریی عێراق دەکات، بەڵکو بنەماکانی هاوبەشیی نێوان بەغدا و واشنتن تێکدەدات، جەختیی کردەوە، پێویستە ڕێکاری دەستبەجێ بگیرێتەبەر بۆ هەڵوەشاندنەوەی ئەو گرووپانەی کە ئەجێندای دەرەکی جێبەجێ دەکەن و دەبنە هەڕەشە بۆ سەر سەروەری و سەقامگیریی عێراق.