هەولێر و ڕانیە پشتیوانیی خۆیان بۆ كوردانی حەلەب دەردەبڕن

ئاڤا نیوز

لە شارەكانی هەولێر و ڕانیە گردبوونەوەی جەماوەری بۆ پشتیوانیی كوردانی گەڕەکە کوردییەکانی حەلەب بەڕێوەچوو، خۆپیشاندەران داواکار بوون هەموو كورد و لایەنە سیاسییەكان لەدژی ئەو كۆمەڵكوژیە هاودەنگ بن.

چیرۆکی سەرەکی: ئەمرۆ هەینی، لە شاری هەولێر بە دەیان هاونیشتمانی گردبوونەوە بۆ دەربڕینی پشتیوانی بۆ خۆڕاگری و بەرگری هەردوو گەڕەكی كوردنشینی ئەشرەفییە و شێخ مەقسود لە شاری حەلەب كە لەلایەن هێزەكانی سوپای عەرەبی سووریاوە پەلامار دەدرێن.

هاوكات لە شاری ڕانیە، دەیان هاونیشتمانی وەك هەڵوێست وەرگرتن بۆ بەرخودانی و خۆڕاگریی كوردانی حەلەب، گردبوونەوە و داوایان كرد كۆمەڵگەی نێودەوڵەتی بەرامبەر ئەو پێشێلكارییەی حكومەتی نوێی دیمەشق هەڵوێستیان هەبێت.

زانیاریی زیاتر: خۆپیشاندەران بە بەرزكردنەوەی ئاڵای كوردستان و وتنەوەی هوتافی نیشتمانی پشتیوانی خۆیان بۆ كوردانی گەڕەكی شێخ مەقسود و ئەشرەفییە دەربڕی و داواشیان لە لایەنە سیاسییەكان و كوردانی هەر چوار پارچەی كوردستان کرد، بەرامبەر كۆمەڵكوژیی كوردان بێدەنگ نەبن.