ترەمپ: ڤەنزوێلا زیندانییە سیاسییەکان ئازاد دەکات و ئەمریکاش هێرشە سەربازییەکانی رادەگرێت

ئاڤا نیوز

سەرۆکی ئەمریکا، لە پۆستێکیدا لە ترووس سۆشیاڵ ڕایگەیاند، گۆڕانکارییەکی گەورە لە پەیوەندییەکانی نێوان واشنتن و کاراکاس ڕوویداوە. دەڵێت، حکومەتی ڤەنزوێلا وەک نیشانەیەک بۆ گەڕان بەدوای ئاشتیدا، ژمارەیەکی زۆر لە زیندانییە سیاسییەکانی ئازاد کردووە، ئەمەشی بە هەنگاوێکی زۆر گرنگ و ژیرانە وەسف کرد.

وێنە گەورەکە: دوای دەستبەسەرکردنی سەرۆکی ڤەنزوێلا لەلایەن ئەمریکاوە، ئیدارەی ترەمپ هەوڵەکانی چڕکردووەتەوە بۆ دروستکردنی هەماهەنگی لەگەڵ ئەو وڵاتە، بەتایبەتی لە پرسی نۆژەنکردنەوەی ژێرخانی نەوت و غاز بە شێوازێکی مۆدێرن و فراوانتر.

بڵاوکراوەی فەرمی: دۆناڵد ترەمپ، سەرۆکی ئەمریکا لە تروس سۆشیال ڕایگەیاند، بەهۆی ئەم هاوکارییانەی حکومەتی ڤەنزوێلا، بڕیارم داوە قۆناغی دووەمی هێرشەکانمان هەڵبوەشێنمەوە کە چاوەڕوان دەکرا ئەنجام بدرێن، چونکە پێدەچێت چیتر پێویست نەبن، بەڵام سەرجەم کەشتییە جەنگییەکانی ئەمریکا لە شوێنی خۆیان دەمێننەوە لەپێناو پاراستنی ئاسایش و سەقامگیری ناوچەکە.

لەلایەکی دیکەوە: کۆمپانیاکانی بواری نەوتی ئەمریکا بەبڕی 100 ملیار دۆلار لە کەرتی وزەی ڤەنزوێلا وەبەرهێنان دەکەن. بڕیارە هەر ئەمڕۆش سەرۆکی ئەمریکا لە کۆشکی سپی لەگەڵ نوێنەرانی ئەو کۆمپانیایانە کۆببێتەوە بۆ تاوتوێکردنی وردەکارییەکانی پڕۆژەکە.