کۆبوونەوەی پەرلەمانی عێراق لەبارەی داهاتە نانەوتییەکان هەڵگیرا؛ "سبەی لەسەر هەمان پرس کۆدەبێتەوە"

ئاڤا نیوز

 

کۆبوونەوەی ئەمڕۆی پەرلەمانی عێراق تایبەت بوو بە گفتوگۆکردن لەسەر بابەتی داهاتە نانەوتییەکان و چۆنیەتی باشترکردنی بەڕێوەبردنیان و زیادکردنیان لە چوارچێوەی بودجەدا، کۆبوونەوەکە هەڵگیرا و سبەی پەرلەمان لەسەر هەمان بابەتە درێژە بە کۆبوونەوەکانی دەدات.

 

وێنە گەورەکە: ماوەیەکە عێراق لە هەوڵی ئەوەدایە داهاتەکانی هەمەجۆر بکات و تەنیا پشت بە داهاتی نەوت نەبەستێت، لە کاتێکدا داهاتی گشتی ئەو وڵاتە 95%ـی لەسەر داهاتی نەوتە.

 

لێدوانی فەرمی: شێروان دووبەردانی، ئەندامی پەرلەمانی عێراق، بە ئاڤا میدیای ڕاگەیاند: "کۆبوونەوەی ئەمڕۆی پەرلەمانی عێراق تایبەت بوو بە تاوتوێکردنی داهاتە نانەوتییەکان، لەسەر ئەم بابەتە 100  پەرلەمانتار ناوی خۆیان بۆ قسەکردن نووسیبوو و لەو ژمارەیەش 60 پەرلەمانتار قسەی خۆیان کرد."

 

شێروان دووبەردانی وتیشی: "پێش هەڵبژاردنی سەرۆککۆمار لە کۆتایی ئەم مانگەدا، ئەندامانی لیژنە هەمیشەییەکان پەرلەمان یەکلایی دەکرێنەوەو دەستبەکاردەبن.

 

لەبارەی ڕاسپاردەکەی پەرلەمانیش بۆ وەزارەتی پەروەردەی عێراق کە تایبەت بوو بە دەرفەتدان بە تاقیکردنەوەی تر بۆ قوتابیانی پۆلی 12 تا نمرەکانیان باشتر بکەن، دووبەردانی، دەڵێت: "ئەم ڕاسپاردەیە بۆ وەزارەت پابەندکار نییە و پێشنیازێکە بۆ بەرژەوەندی قوتابیان کراوە."

 

ئەوەی پێویستە بیزانیت: سبەی یەکشەممە، کۆبوونەوەی پەرلەمان لەسەر پرسی داهاتە نانەوتییەکان، چۆنیەتی باشترکردنی بەڕێوەبردنیان و زیادکردنیان لە چوارچێوەی بودجەدا بەردەوام دەبێت و 40 پەرلەمانتارەکەی دیکەش قسەی خۆیان دەکەن.