هاوپەیمانێتییەکەی سوودانی بۆ مالیکی لە کێبڕکێی پۆستی سەرۆکوەزیران کشایەوە

ئاڤا نیوز

سەرکردەیەکی هاوپەیمانیی ئاوەدانکردنەوە و گەشەپێدان ڕایگەیاند، محەممەد شیاع سوودانی، سەرۆکی هاوپەیمانێتییەکەیان، لە کێبەرکێی هەڵبژاردنی سەرۆکوەزیران کشایەوە؛ بەوەش نووری مالیکی بووە کاندیدی فەرمیی چوارچێوەی هەماهەنگی بۆ پۆستی سەرۆکوەزیرانی عێراق.

بڵاوکراوەی فەرمی: قوسەی مەحبووبە، یەکێک لە سەرکردە دیارەکانی هاوپەیمانیی ئاوەدانکردنەوە و گەشەپێدان، لە هەژماری خۆی لە تۆڕی کۆمەڵایەتی ئێکس ڕایگەیاند: هاوپەیمانێتییەکەیان و هاوپەیمانیی دەوڵەتی یاسا کۆتایییان بە خواستی ناواقیعی و بنبەستی سیاسی لەناو چوارچێوەی هەماهەنگیدا هێنا؛ بە جۆرێک محەممەد شیاع سوودانی، سەرۆکوەزیرانی ئێستای عێراق و سەرۆکی هاوپەیمانیی ئاوەدانکردنەوە و گەشەپێدان، لە بەرژەوەندیی نووری مالیکی، سەرۆکی هاوپەیمانیی دەوڵەتی یاسا کشایەوە؛ بەوەش مالیکی بوو بە کاندیدی فەرمیی چوارچێوەی هەماهەنگی بۆ پۆستی سەرۆکوەزیرانی عێراق.

ئەوەشی خستووەتە ڕوو، بەم هەنگاوەش سوودانی سەلماندی کە پڕۆژەکەی، پڕۆژەی دەوڵەت و قوربانیدانە بۆ کۆتایی هێنان بە بنبەستی سیاسی.

ئەوەی پێویستە بیزانیت: هاوپەیمانیی ئاوەدانکردنەوە و گەشەپێدان گەورەترین فراکسیۆنی ناو چوارچێوەی هەماهەنگیی شیعەکان بوو و 46 کورسی هەبوو، لە کاتێکدا هاوپەیمانێتیی دەوڵەتی یاسا خاوەنی 29 کورسییە.