عێراق: پاراستنی زیندانەکانی داعش ئەرکێکی جیهانییە

ئاڤا نیوز

عێراق لە ئەنجوومەنی ئاسایش ڕایگەیاند پاراستنی زیندانەکانی داعش لە سووریا بەرپرسیارێتییەکی نێودەوڵەتییە و بڕیاری ستراتیژیی بۆ وەرگرتنەوەی مەترسیدارترین سەرکردەکانی ئەو ڕێکخراوەی داوە.

لێدوانی فەرمی: عەباس کازم، نوێنەری عێراق لە ئەنجوومەنی ئاسایش ڕایگەیاند: "پرسی زیندانەکانی داعش لە سووریا تەنها بابەتێکی ناوخۆیی نییە، بەڵکو پەیوەستە بە ئاسایشی نیشتمانیی عێراق؛ هەر جۆرە کەمتەرخەمییەک لە کۆنتڕۆڵکردنی ئەم زیندانانە، دەرفەت بە داعش دەدات بۆ ڕێکخستنەوەی شانە چەکدارەکانی."

زانیاریی زیاتر: عێراق بە فەرمیی پێشوازیی لەو لێکتێگەیشتنانە دەکات کە لەنێوان حکومەتی دیمەشق و هێزەکانی سووریای دیموکرات (هەسەدە) سەبارەت بە داهاتووی پارێزگای حەسەکە و یەکخستنی دامەزراوەکان هاتوونەتە ئاراوە.

ئەوەی پێویستە بیزانیت: لە کۆبوونەوەی تایبەتی ئەنجوومەنی ئاسایشی نەتەوە یەکگرتووەکان کە ڕۆژی 22-01-2026 بەڕێوەچوو، جەخت لەوە کرایەوە کە سەقامگیریی سووریا ڕاستەوخۆ کاریگەریی لەسەر ئاسایشی عێراق و تەواوی ناوچەکە هەیە.

ئەمەش بزانە: عێراق بە هەماهەنگیی لەگەڵ هاوپەیمانیی نێودەوڵەتیی، بڕیاری وەرگرتنەوەی ئەو تێرۆریستە مەترسیدارانەی داعشی لە زیندانەکانی ژێر دەستی هەسەدە داوە، تاوەکو وەک ڕێکارێکی پارێزگاریی ڕێگریی لە دووبارە بڵاوبوونەوەیان بگرێت.