سەرۆکی دەزگای خێرخوازیی بارزانی: تاوەکو ئێستا 255 بارهەڵگر پێداویستی ڕەوانەی ڕۆژئاوای کوردستان کراوە

ئاڤا نیوز

دەزگای خێرخوازیی بارزانی لە شەشەمین ڕاپۆرتی مەیدانیی خۆیدا ئاشکرای کرد، تاوەکو ئێستا لەرێگەی 255 بارهەڵگرەوە هاوکاریی جۆراوجۆری مرۆیی و تەندروستیی گەیاندووەتە دەست هەزاران خێزانی لێقەوماو لە ڕۆژئاوای کوردستان.

لێدوانی فەرمی: موسا ئەحمەد، سەرۆکی دەزگای خێرخوازیی بارزانی لە کۆنفرانسێکی ڕۆژنامەوانییدا ڕایگەیاند: تاوەکو کاتژمێر 12:00ـی شەوی 29-01-2026، لەرێگەی 255 بارهەڵگر و بە چالاکیی 478 کرێکار و کارمەند، توانیمان هاوکارییەکان بگەیەنینە ناوەندەکانی نیشتەجێبوون و قوتابخانەکان تاوەکو ڕێگریی لە کارەساتی تەندروستیی و برسێتیی بگرین.

زانیاریی زیاتر: چالاکییەکانی دەزگای خێرخوازیی بارزانی لە ڕۆژئاوای کوردستان چەندین کەرتی جیاوازی گرتووەتەوە؛ بڕی 241,632 لیتر نەوتی بەسەر 6,850 خێزانی ئاوارە و 178 قوتابخانە و 10 مزگەوتدا دابەش کراوە. هاوكات تیمەکان توانیویانە 25,589 ژەمە خواردنی گەرم بۆ ئاوارەکانی ناو 69 قوتابخانە و 5 مزگەوت ئامادە بکەن، هەروەها تیمە پزیشکییەکانی دەزگاکە توانیویانە خزمەتگوزاریی بگەیەننە 3,541 کەس و پشکنینی ورد بۆ قوتابییانی 47 قوتابخانە ئەنجام بدەن، کە ئەمەش کاریگەریی گەورەی لەسەر کەمکردنەوەی نەخۆشییە وەرزییەکان لەناو کەمپە کاتییەکاندا هەبووە.

جگە لەمانە، 7,475 خێزانی دیکە هاوکاریی جۆراوجۆری وەک پێداویستیی ناوماڵ و کەلوپەلی زستانییان پێگەیشتووە تاوەکو بەرگەی سەرما و سۆڵەی ئەم دواییە بگرن.

باکگراوند: دەزگای خێرخوازیی بارزانی لە سەرەتای پەرەسەندنی ئاڵۆزییە سەربازییەکانی سووریا لە ساڵی 2026، بە ڕاسپاردەی سەرۆک بارزانی وەک یەکەمین ڕێکخراوی مرۆیی هاوکارییەکانی گەیاندە ڕۆژئاوای کوردستان.