ئێران بۆ ئەمریکا: وەڵاممان دەستبەجێ و یەکلاکەرەوە دەبێت

ئاڤا نیوز

سوپای ئێران ڕایگەیاند هەر هێرشێکی ئەمریکا بۆ سەر وڵاتەکەیان ڕووبەڕووی وەڵامێکی "دەستبەجێ و یەکلاکەرەوە" دەبێتەوە و بنکە سەربازییەکانی واشنتن لە ناوچەکە دەکەنە ئامانج.

لێدوانی فەرمی: محەممەد ئەکرەمینیا، وتەبێژی سوپای ئێران ڕایگەیاند: "کارەکە بەو شێوەیە نابێت کە ترەمپ بیری لێ دەکاتەوە؛ کە ئۆپەراسیۆنێکی خێرا ئەنجام بدەن و دوای دوو کاتژمێر لە تویتەر بنووسێت ئۆپەراسیۆنەکە کۆتایی هات؛ ئێمە وەڵامی یەکلاکەرەوەمان دەبێت."

زانیاریی زیاتر: وتەبێژەکەی سوپا جەختی لەوە کردەوە کە بنکە سەربازییەکانی ئەمریکا لە ناوچەکەدا و کەشتییە فڕۆکەهەڵگرەکانیان ئامانجی سەرەکیی مووشەکەکانی ئێرانن. بە گوتەی ئەو، زۆرێک لەم بنکانە لە ژێر مەودای مووشەکە مامناوەندەکانی ئێراندان و کەشتیگەلە جەنگییەکانی ئەمریکاش "خاڵی لاوازی جدییان" هەیە کە تاران دەتوانێت سوودیان لێ ببینێت بۆ پەکخستنی جووڵە سەربازییەکان.

ئەوەی پێویستە بیزانیت: ئەم هۆشدارییانە ڕاستەوخۆ دوای جێگیرکردنی کەشتیی جەنگیی (USS Abraham Lincoln) لە ئاوەکانی ناوچەکە دێت، کە وەک بەشێک لە فشاری سەربازیی ئیدارەی نوێی ترەمپ بۆ سەر تاران لێک دەدرێتەوە.