کۆنگرێسمانێکی ئەمریکا بۆ چوارچێوەی هەماهەنگی: چانسی خۆتان تاقی مەکەنەوە و سوکایەتی بە ترەمپ مەکەن

ئاڤا نیوز

ئەندامێکی کۆنگرێسی ئەمریکا لە پەیامێکی توونددا هۆشداری دەداتە کاندیدی سەرۆکوەزیرانی عێراق و لایەنەکانی نزیک لە تاران و دەڵێت: چانسی خۆتان تاقی مەکەنەوە.

بۆچی گرنگە: ئەم هەڕەشەیەی جۆو وێڵسن، ئەندامی کۆنگرێسی ئەمریکای سەر بە کۆمارییەکان دوای بڕیاری چوارچێوەی هەماهەنگی دێت لە مکوڕبوونیان لەسەر کاندیدکردنی نووری مالیکی بۆ پۆستی سەرۆکوەزیرانی داهاتووی عێراق. شەوی ڕابردوو چوارچێوەی هەماهەنگی شیعەکان کۆبووەوە، لە کۆبوونەوەکەی سەرکردەکانی چوارچێوەی هەماهەنگی، بڕیار لەسەر مانەوەی نووری مالیکی وەکو کاندیدی چوارچێوەکە بۆ پۆستی سەرۆکوەزیران درا.

بڵاوکراوەی فەرمی: بەگوێرەی تویتێکی جۆو وێڵسن، ئەندامی کۆنگرێسی ویلایەتە یەکگرتووەکانی ئەمریکا. ویڵسن هۆشداری دەداتە مالیکی و گرووپەکانی سەر بە ئێران لە سووکایەتیکردن بە ترەمپ و داوایان لێ دەکات چانسی خۆیان تاقی نەکەنەوە.

- ئەندامەکەی کۆنگرێس جەخت لە ڕزگارکردنی عێراق لە هەژموونی ئێران دەکاتەوە و ئاماژە بەوە دەدات کە کاردانەوەی ئەمریکا بۆ مکوڕبوون لەسەر کاندیدیکردنی مالیکی زۆر تووند دەبێت.

باکگراوند: پێشتر دۆناڵد ترەمپ هۆشداری دابوو کە ئەگەر مالیکی ببێتە سەرۆکوەزیران، ئەوا ئەمریکا هەموو جۆرە هاوکارییەکی دارایی و سەربازی بۆ عێراق بە تەواوی ڕادەگرێت.

دەقی پۆستەکەی جۆو وێڵسن

بۆ بووکەڵەکانی ئێران لە عێراق و بۆ نووری مالیکی؛ ئێوە سووکایەتی بە سەرۆک ترەمپ دەکەن. دەی تاقی بکەنەوە و چانس و توانای خۆتان تاقی بکەنەوە، ئەو کات دەبینن چی ڕوودەدات! عێراق لە دەستی ئێران ڕزگار بکەن.

بەرەو ئێرانی ئازاد.