لە ژەنەراڵی چیاکانەوە بۆ ژەنەراڵی ناو کۆشکی ئەلیزێ

پەنجاو هەشت ساڵ لەمەوبەر و لە تەمەنی 65 ساڵیدا، لە ناو چیا سەرکەشەکانی کوردستانەوە، ژەنەراڵ مستەفا بارزانی پەیامێکی مێژوویی ئاراستەی کۆشکی ئەلیزێ و ژەنەڕاڵ چارڵز دیگۆلی ڕزگارکەری فەرەنسا کردووە. پەیامێک لە سەرەتا تا کۆتایی (بە کوردی) تەنها 236 وشەیە، بەڵام لەناوەڕۆک و ئاماژەکانیدا زۆر دەوڵەمەند و پڕ بەها و فرە ڕەهەندە.

ئەو نامەیەی بارزانیی نەمر کە لە 8ـی  شوباتی 1968 ـدا واژۆکراوە، تەنیا داواکارییەک نەبووە بۆ پشتیوانیی سەربازی، بەڵکو بانگەوازێکی ئەخلاقی و ستراتیژی بوو بۆ بەهۆشهێناوە و ڕاچڵەکاندنی ویژدانی مرۆڤایەتی کە سەرنجیان بخەنە سەر خەباتی سەختی گەلێکی گەمارۆدراوی چەوساوە و ستەملێکراو.

ژەنەراڵ بارزانی لە سەرەتای پەیامەکەیدا، زۆر بە خاکەڕایی و بە دوور لە ڕیاکاری، بەوپەڕی بڕوابەخۆبوونەوە خۆی وەک مرۆڤێکی خۆنەویست و سادە ، پێناسەدەکات  و دەنووسێت : "جه‌نه‌ڕاڵ.. بوار بە پیره‌ پیاوێكی وه‌كو من بده‌، ئه‌م داواكارییه‌ گرنگه‌تان بۆ ڕه‌وانه‌ بكەم ، پیره‌ پیاوێك، كه‌ له‌ سه‌ره‌تای گەنجییەوە تا ئێستا، بۆ ئازادی و پاراستنی كه‌رامه‌تی گه‌له‌كه‌ی خه‌بات ده‌كات"

لە سەرەتا تا کۆتایی نامەکە چوار ڕەهەندی گرنگ ئاوێتەی یەکدی دەبن، هەوڵدەدەم لێرە بەدواوە بەش بەش شیکارییان بۆ بکەم :

ڕەهەندی سیاسی: بارزانی بەو سەرەتا سادەیە، پیشانی دەدات کە جیا لە زۆربەی سیاسی و شۆڕشگێڕەکانی ئەو سەردەمەی جیهانی سێیەم، گەنجێکی هەرزەو پەڕگیر و دەمارگیری کەم ئەزموون نییە، بەڵکو سەرکردە و مرۆڤێکی پێگەیشتووی، تێگەیشتووی،  قاڵبووی کۆڕی خەباتە و نوێنەرایەتی تەواوی گەلێکی ستەملێکراو دەکات! بەمەش سەنگێکی سیاسی بە پەیامەکەی بەخشیوە.

ڕەهەندی ئەخلاقی: خاکەڕایی و داننان بە تەمەنی هەڵکشاویی خۆیدا، بەهایەکی ئەخلاقی بە خاوەنی پەیام دەبەخشێ و متمانە و ڕێزیش لەلای خوێنەری پەیام دەخوڵقێنێ.

ڕەهەندی ڕەمزی: ئاماژەدان بە تەمەنی خۆی و بەرخۆدانی بەردەوامی کورد، ڕەمزییەتێکی مێژوویی بە شۆڕشی ڕزگاریخوازی گەلی کورد بەخشیوە.

ڕەهەندی مرۆیی: بە ئاماژەدان بە قوربانیدانی شەخسیی خۆی و گەلەکەی لە پێناو ئازادی و کەرامەتدا، ویژدانی مرۆڤایەتی دەدوێنێ و دەیکاتە دادوەر.

پاشان ژەنەراڵ بارزانی دۆزی کورد بە بەهاکانی جیهانی ئازادی ئەو سەردەمەوە دەبەستێتەوە و هەر لەو ڕووەشەوە ستایشی ژەنەراڵ دیگۆل و پێگە باڵاکەی دەکات: "ئێوه‌ کە گه‌وره‌ترین خه‌باتگێڕی بەرەنگاری بوون له‌ ئه‌وروپا و‌ وڵاتی خۆتان گەیاند بە سه‌رفرازی، ناتوانن هاوسۆزی گه‌لی كوردی چیانشین نه‌بن، كه‌ ماوه‌ی شه‌ش ساڵه‌ له‌ باكووری عێراقدا، له‌ خه‌باتی بێوچاندایه‌."

ڕەهەندی سیاسی: بارزانی بە ئاماژەدان بە بەرخۆدان و خەباتی گەلانی ئەوروپا و سەرفرازیی گەلی فرەنسا و داواکردنی هاوسۆزی لە ژەنەراڵ دیگۆڵی سیمبوڵی ئازادی، پرس و دۆزی ڕەوای کورد، لە کێشەو ململانێیەکی ناوخۆی عێراقەوە دەگوازێتەوە بۆ ئاستێکی جیهانی و سەرنجی زلهیزێکی نێودەوڵەتیی بۆ ڕادەکێشێ.

ڕەهەندی ئەخلاقی: ڕایەڵەی ڕێزێکی هاوبەشی ئەوتۆ لەنێوان خۆی و دیگۆڵ دا ڕادەکێشێ، بەوەش متمانەیەکی زیاتر بە ناوەڕۆکی پەیامەکەی دەبەخشێ.

ڕەهەندی ڕەمزی: بەراوردی بەرخۆدانی  گەلی کورد بە بەرخۆدانی گەلانی ئەوروپا و گەلی فەرەنسی، دڵنیاییەکە کە کوردیش بڕوای هەیە بە پرنسیپی؛ "خەبات دژی نادادپەروەری، بەهایەکی هاوبەشی گەلانە".

ڕەهەندی مرۆیی: بارزانی ڕاستەوخۆ تیشکی خستۆتە سەر ئامانجی باڵای شۆڕش و خەباتی بێوچانی کورد کە پاراستنی ئازادی و کەرامەتی گەلی کوردە.

بارزانی بەردەوام دەبێ لە گرێدانەوەی داواکارییەکانی کورد بە پرنسیپەکانی  ئازادی و مافی چارەی خۆنووسینی گەلانەوە، کە زادەی شۆڕشی گەورەی فەرەنسان: "ئێوە سه‌رۆكی فه‌ره‌نسان، سه‌رۆكی ئه‌و نه‌ته‌وه‌ به‌رز و باڵایه‌ن كه‌ پره‌نسیپی ئازادییه‌ سیاسییه‌كان و مافی چاره‌ی خۆنووسینی پێشكه‌ش بە گه‌لانى دنیا كرد."

ڕەهەندی سیاسی: ئەو دوو ڕستەیەی پەیامەکەی ژەنەراڵ بارزانی، فەرەنسا ڕووبەڕووی بەرپرسیارێتییەکی گەورە دەکاتەوە لە هاوتەریبکردنی هەڵوێست و کردەوەکانی، لەگەڵ ئەو پرنسیپە مێژوویی و چەمکە سیاسییە ڕەسەنەدا کە لە دنیادا خاوەندارییان لێدەکات.

ڕەهەندی ئەخلاقی: بارزانی بە ناڕاستەوخۆ دەڵێت: هەر بێباکی و بێبایەخکردنێکی داخوازییە ڕەواکانی گەلی کورد، وەک دووڕوویی و ئابڕووچوونێکی ئەخلاقی  لێکدەدرێتەوە.

ڕەهەندی ڕەمزی: بارزانی، پرسی کوردی بەستووەتەوە بە مێژووی فەرەنسا و پێگەو سەنگییەوە لە جیهاندا.

ڕەهەندی مرۆیی: خەبات و شۆڕشی کوردی بەستووەتەوە  بە دەستەبەرکردنی  ئازادی و مافی ژیانێکی پڕ کەرامەتەوە، کە دوو بەهای هاوبەشی مرۆڤایەتیین.

ژەنەراڵ بارزانی، بۆ پاڵپشتیی لە داواکارییەکانی کورد، هەڵوێستەکانی دیگۆل لە پرسە جیهانییەکانی دیکەدا وەبیردێنێتەوە و دەڵێت: "ژه‌نه‌ڕاڵ.. ئێوه‌ سوور بوون له‌سه‌ر ناڕه‌زایی به‌رامبه‌ر شه‌ڕی ڤێتنام، من گومانم نییە کە پرسی گه‌لی كوردیش له‌لای ئێوه، له‌ پرسی  ڤێتنامییه‌كان كه‌متر نییه."

ڕەهەندی سیاسی: بارزانی، پەنای بۆ بەراوردێکی وردی ستراتیژی بردووە لەپێناو زیادکردنی دەرفەتی بەدەستهێنانی هاوسۆزیی فەرەنسای زلهێز بۆ دۆزی نەتەوەکەی.

ڕەهەندی ئەخلاقی: بە زیرەکی و ژیرانە، ئومێدی هاوسۆزیی بۆ پرسی کورد، وەک هەڵوێستێکی ئەخلاقی، بەستۆتەوە بە هەڵوێستی تری هاوشێوەی ژەنەراڵ دیگۆلەوە.

ڕەهەندی ڕەمزی: بێ چەندو چوون، هاوشێوەی گەلی ڤێتنام،  کوردی وەک بەشێک لە گەلانی ستەملێکراوی جیهان پێناسەکردووە.

ڕەهەندی مرۆیی: بەهای وەکیەکیی خەڵکی بێتاوانی کورد و گەلانی دیکە و مرۆڤبوونی کوردی بەرزڕاگرتووە.

پاشان ڕاستەوخۆ گۆشەگیرکردنی کورد و بێباکی و خەمساردیی نێودەوڵەتی ئاشکرا دەکات و دەڵێت: "ئێمە لەم شەڕو خەباتەماندا بۆ بەرگری لە نەتەوەکەمان، یەکجار تەنیا و بێ کەسین. سازمانی نەتەوە یەکگرتووەکانیش بە تەواوی پشتگوێی خستووین، چه‌ندین زلهێزیش له‌ هاوکاریی عێراقدا، به ‌نوێترین چه‌كی وێرانكەر، پێشبڕكێی یه‌كتر ده‌كه‌ن... "

ڕەهەندی سیاسی: ڕاستەوخۆو بێ پێچ وپەنا، سازمانی نەتەوەیەکگرتووەکان بە چاوپۆشی و زلهێزەکانیش بە پێدانی چەک بە دەوڵەتی عێراق بۆکوشتنی خەڵکی کورد، تۆمەتباردەکات.

ڕەهەندی ئەخلاقی: ژەنەراڵ بارزانی ئەو گەمارۆدان و گۆشەگیرکردنەی گەلی کوردی کردۆتە ئارگومێنتێکی ئەخلاقی بۆ ئەوەی ژەنەراڵەکەی فەرەنسا هانبدات بەپێی پرەنسیپی ئازادیی گەلان مامەڵە لەگەڵ پرسی کوردیشدا بکات.

ڕەهەندی ڕەمزی: گەمارۆدان و گۆشەگیرکردنی گەلێک، نیشانە و بەڵگەی نادادپەروەرییە لە جیهاندا، ئەو پەیامەی بارزانییش هاواری بێ دادییە و دەدرێت بە گوێی دنیادا بە ئومێدی ڕاچڵەکاندنی ویژدانی خەوتووی نێودەوڵەتی.

ڕەهەندی مرۆیی: بارزانی بە دیگۆل دەڵێت: بەردەوامیی گەمارۆو گەلەکۆمەکێ و پێدانی چەک بە عێراق و چاوپۆشیی دنیا، هەڕەشە و مەترسیی ڕاستەوخۆن بۆ سەر ژیانی سەدان هەزار ژن و منداڵی کورد.

هۆشدارییەکەی بارزانی ئەو کاتە دەگاتە لووتکە، کە پێدانی چەک بە دەوڵەتی عێراق دەبەستێتەوە بە بەرپرسیارێتییەکی سەختەوە، دەڵێت: "بەبێ چارەسەرێکی بنەڕەتی بۆ پرسی کورد، هەر جۆرە پێدانێکی چەک بە عێراق تەنیا دەبێتە هۆی وێرانکردنی  وڵاتەکەمان و کۆمەڵکوژیی ژن و منداڵمان."

ڕەهەندی سیاسی: بارزانی تەنیا بەو دوو ڕستەیە واتای پشتیوانیی سەربازیی  سەروژێردەکات و دەیگۆڕێت بە بەرپرسیارێتییەکی ستراتیژیی چارەنووسساز کە مان و نەمانی نەتەوەیەکی پێوە بەستراوە.

ڕەهەندی ئەخلاقی: بەر لەوەی کارەسات ڕووبدات، فەرەنسای ڕووبەڕووی بەرپرسیارێتییەکی ئەخلاقی کردۆتەوە.

ڕەهەندی ڕەمزی: بارزانی ناڕاستەوخۆ، دیگۆل و دنیا، ڕووبەڕووی پرسیارێکی جەوهەری دەکاتەوە، کە ئایا پێدانی چەک و پشتیوانیی سەربازیی، دەبێ لەخانەی دادپەروەری ستەملێکراواندا بێت یان لە خزمەتی نا دادپەروەری و ستەمکاراندا؟.

ڕەهەندی مرۆیی: جەختکردنەوە لە مەترسیی کۆمەڵکوژیی خەڵکی بێتاوان، سەنگ و کێشێکی مرۆیی زۆری داوە بە ناوەڕۆکی پەیامەکەی بارزانی.

ژەنەراڵەکەی ناوچیا، کە سەرباری شۆڕشگێڕی، عارفێکی خوداناسی بێگەردیشە، لە کۆتایی نامەکەیدا بۆ ژەنەراڵەکەی ناو کۆشکی ئەلیزێ لە پاریس ، هێمایەکی ئایینی و مرۆیی دەکات بە ( مسک الختام ) تا قووڵایی ڕەهەندێکی ڕۆحیی پیرۆزیش ببەخشێ بە پەیامەکەی: "قورئانی پیرۆز ده‌ڵێت: (هەر مرۆڤێك له‌ ئاسماندا به‌هه‌شتێكی بچووكی خۆی هه‌یه‌‌ له‌ كاتی نوێژکردندا ڕووی تێ دەكات)، ئێوه‌ و فه‌ره‌نساش به‌هه‌شتەکەی ئاسمانی ئێمه‌ن."

نامەکەی ژەنەڕاڵی کوردی بێ کەس، بۆ دیگۆلی زلهێز و دەست وقسە ڕۆیشتوو، تەنیا تۆمارێکی دیپلۆماسی نییە، بەڵکو بەڵگەنامەیەکی فرەڕەهەند و شیکردنەوەیەکی واقیعیانەیە بۆ پەیوەندییە نێودەوڵەتییەکان و بێ کەسیی ئەو ڕۆژە سەختانەی کورد، لەناو بەیەکداچوون و تێکڕژانی بەهاو بەرژەوەندی وملململانێ ناوچەییەکاندا.

بانگەوازێکی ئەخلاقییە بە نیازی گەیشتن بە ویژدانی نێودەوڵەتی لەڕێی فەرەنساوە.

پەیامێکی مێژووییە بەدنیای ئازاد دەڵێت: دۆزی کورد دژی ستەمە و هاوبەشتانە لە بەها باڵاکانی مرۆڤایەتیدا.

بانگەوازێکە بۆ ئەوساو بۆ ئێستاو بۆ ئایندەیش کە دنیایەکی بێ ستەم بە پشتیوانی و پڕچەککردنی ڕژێمە ستەمکارەکان و پشتگوێخستنی مافی گەلان نایەتە دی !.