ئاسایشی نیشتمانیی عێراق دەستگیرکردنی والی ئەنباری داعش ڕادەگەیێنێت

ئاڤا نیوز

دەزگای ئاسایشی نیشتمانیی عێراق ڕایدەگەیێنێت، توانیویانە دوای ساڵێک لە کارکردنی وردی هەواڵگری، تۆڕێکی تیرۆریستیی مەترسیدار لە ئەنبار تێکبشکێنن و ڕێگری لە ئەنجامدانی چەندین تەقینەوە و هێرشی تیرۆریستی بکەن.

بڵاوکراوەی فەرمی: ئەرشەد حاکم، گوتەبێژی دەزگای ئاسایشی نیشتمانیی عێراق لە پەیامێکی ڤیدیۆییدا ڕایگەیاند، هێزەکان تیرۆریستێکی مەترسیداریان بەناوی ئەبو ئەیمەن ئەلڕاوی دەستگیر کرد، کە والی ئەنبار بووە و لە کاتی دەستگیرکردنیدا پشتێنەیەکی بۆمبڕێژکراوی بەستبوو تاوەکو چەند هێرشێک ئەنجام بدات.

- بەگوتەی ئەرشەد حاکم، ئۆپەراسیۆنەکە بووە هۆی دەستگیرکردنی چەند تیرۆریستێکی دیکەی بەرپرس لە گواستنەوە، پشتگیریکردن، دروستکردنی فڕۆکەی بێفڕۆکەوانی بۆمبڕێژکراو و بەڕێوەبردنی دۆسیە کیمیاییەکانی ناو ڕێکخراوی تیرۆریستیی داعش لە ناوچەکەدا.

زانیاریی زیاتر: هاوکات لە هەڵمەتدا بەرپرسی ئەمنیی ئەنبار و دوو هاوەڵی لە حەشارگەیەکدا گەمارۆدران، کە دواتر هەر سێکیان خۆیان تەقاندەوە.