پڕۆژەیەکی ئاو لە بەردەڕەش 250 بیر دادەخات

ئاڤا نیوز

دوای ئەوەی بڕیار لەسەر پڕۆژەی ستراتیژی ئاوی بەردەڕەش درا، بە گوژمەی زیاتر لە 400 ملیار دینار، نەخشەی پڕۆژەکە تەواو کراوە و کارکردن تیایدا بەردەوامە، ئەم پرۆژەیە 250 بیری ئاو لە ناوچەکە دادەخات. 

لێدوانی فەرمی: خەڵات ئەبوبەکر، بەڕێوەبەری ئاوی دەوروبەری دهۆک، بە ئاڤای ڕاگەیاند: نەخشەی پڕۆژەکە تەواو بووە، کارکردن لە ڕێگا سەرەکییەکان و ڕێگای بورجەکانی کارەباکەی دەکرێت، ڕۆژانە دەیان ئامێر لە 10 شوێنی جیاواز کار لە پڕۆژەکە دەکرێت، بڕیارە لە پێش وادەی خۆی کارەکانی تەواو بکرێت.

لەلایەکی دیکەوە: ڕێبەر نازم خورشید، بەڕێوەبەری ئاوی بەردەڕەش، بە ئاڤای ڕاگەیاند: پڕۆژەی ستراتیژی ئاوی بەردەڕەش دەستی بە کارەکانی کردووە، ڕۆژانە زیاتر لە  80 ئامێر لە 10 شوێن کار دەکرێت.

بەڕێوەبەری ئاوی بەردەڕەش، ئاماژەی بەوەکرد، "سەرەڕای وەرزی زستان و ھاتنی بارانی بەردەوام کۆمپانیا بەردەوامە لە کارکردن و زۆر بەخێرایی کار دەکەن، بڕیارە لە ماوەی سالێک و پێنج پڕۆژەکە تەواو بکرێت و ماوەی دوو ساڵی بۆ دانراوە."

٠ کۆمپانیا زۆر جدییە و دەیەوێت بەزووترین کات پڕۆژەکە تەواو بکات، بەتەواوبوونی پڕۆژەکەش 250 بیری ئاوی خواردنەوە دادەخرێن و ھیچ بیرێک نامینێت و بۆ ئاوی خواردنەوە.

زانیاریی زیاتر: ئەم پڕۆژەیە دەکەوێتە سەر زێی گەورە و بە دووری دوو کیلۆمەتر لە گوندی 'دالەڕێ' دروست دەکرێت، پێکدێت لە وەرگری ئاو و وێستگەی پاڵاوتنی ئاو، 39 عەمباری ئاویشی بە قەبارەی جیا جیا بۆ دروست دەکرێت، ئەم پڕۆژەیە تۆڕی ئاو بۆ قەزا، ناحیەکان و گوندەکان دەگەیێنێت و بەمهۆیەوە زیاتر لە 95 گوند سوودمەند دەبێت.

باکگراوند: پڕۆژەی ستراتیژیی ئاوی بەردەڕەش، یەکێکە لە گەورەترین پڕۆژەکانی سنووری پارێزگای دهۆک، بە گوژمەی زیاتر لە 400 ملیار دینار، لە کابینەی نۆیەمی حکومەتی هەرێمی کوردستان دەستی بەکارەکانی کرد.