لە گرتووخانەی گەورانی هەولێر زیاتر لە 180 حوكمدراو وەكو قوتابی ئاسایی دەخوێنن

ئاڤا نیوز

لە بەڕێوەبەرایەتیی چاكسازیی گەورانی هەولێر، زیاتر لە 150 سزادراو وەكو قوتابی بەهەمان سیستەمی فەرمیی وەزارەتی پەروەردە و زیاتر لە 30 حكومدراویش وەكو قوتابی ئاستی پەیمانگە و زانكۆ، بەهەمان سیستەمی وەزارەتی خوێندنی باڵا، دەخوێنن.

وێنە گەورەکە: لە چوارچێوەی ستراتیژیی بەڕێوەبەرایەتی چاکسازیی گەورانی هەولێر بۆ چاکسازیی کۆمەڵایەتی و دووبارە شیاندنەوەی سزادراوان و دروستكردنی دەرفەتی نوێ بۆ ژیانێكی باشتر بۆیان، پڕۆسەی خوێندن و فێربوون وەک یەکێک لە سەرەکیترین پڕۆگرامەکان بە شێوەیەکی ڕێکخراو و بەردەوام بەڕێوەدەچێت.

ڕاگەیێنراوی فەرمی: بەشی ڕاگەیاندنی بەڕێوەبەرایەتیی چاكسازیی گەورانی هەولێر ڕایدەگەیێنێت، جگە لە حوكمدراوانی هەردوو قوتابخانەی نوێبوونەوە بۆ خوێندنی خێرا و ئامادەیی نوێگەری، بۆ ساڵی خوێندنی 2025-2026، زیاتر لە 150 قوتابی ڕۆژانە بە پێی هەمان سیستەمی فەرمیی وەزارەتی پەروەردە درێژە بە خوێندن دەدەن، كە وانەکان لە چوارچێوەی پڕۆگرام و کاتی دیاریکراودا پێشکەش دەکرێن و هەموو مەرجەکانی خوێندنی فەرمی تێدا دابین کراوە.

زانیاریی زیاتر: هاوكات زیاتر لە 30 قوتابی لە ئاستی پەیمانگا و زانکۆ، لە شەش ڕۆژی هەفتەدا بەردەوامن لە خوێندنەکانیان، بە تایبەتی لە پەیمانگا و زانکۆی (نۆلیج)، کە پڕۆسەی خوێندنیان بەپێی سیستەمی وەزارەتی خوێندنی باڵا و توێژینەوەی زانستی بەڕێوەدەچێت.

بۆچی گرنگە: هەروەكو بەڕێوەبەرایەتیی چاکسازیی گەورانی هەولێر ئاماژە پێ دەکات، خوێندن یەکێکە لە گرنگترین هۆکارەکانی گۆڕانکاریی ڕەفتاری و دروستکردنی کەسایەتییەکی نوێ بۆ سزادراوان، بەمەبەستی ئامادەکردنیان بۆ شیاندنەوە و گەڕانەوەیەکی باشتر بۆ ناو کۆمەڵگا دوای تەواوبوونی ماوەی سزادان.