حکومەتی عێراق پارەی بەشەخۆراكی مانگانە زیاد دەكات

ئاڤا نیوز

نووسینگەی سەرۆكوەزیرانی عێراق ڕەزامەندی دا لەسەر زیادكردنی كرێی خزمەتگوزاریی بۆ بریكارەكانی خۆراک لە 50 دینارەوە بۆ 250 دینار؛ واتە ئەو بڕە پارەیەی لەمەودوا بە بریكاری خۆراک دەدرێت، دەبێتە 1500 دینار بۆ هەر كەسێک.

ڕاگەیێنراوی فەرمی: بەگوێرەی نووسراوێكی سەرۆكایەتیی ئەنجوومەنی وەزیرانی فیدڕاڵ بە واژۆی سەڵاح حەسەن، بەڕێوەبەری نووسینگەی سەرۆكوەزیرانی عێراق ئاڕاستەی وەزارەتی بازرگانیی فیدڕاڵ كراوە، تێیدا ڕەزامەندی دراوە بە زیادكردنی كرێی خزمەتگوزاری دابەشكردنی بەشەخۆراک  لە قازانجی بریكارەكانی خۆراک  لە 50 دینارەوە بۆ 250 دینار، بەو مەرجەی وەزارەتی بازرگانی لە كۆبوونەوەی ئەنجوومەنی وەزیران، ئەو پرسە بخاتەڕوو بۆ ئەوەی دەنگی لەسەر بدرێت.

زانیاریی زیاتر: لە عێراق دەست بە دابەشکردنی بەشەخۆراکی یەکەمی ئەمساڵ کراوە، بەڵام بەشێکی بریکارەکان تاوەکو ئێستا دەستیان بە دابەشکردنی بەسەر هاووڵاتیان نەکردووە، ئەمەش بەهۆی ناڕەزایی بریكارەكانی دابەشكردنی خۆراك لەو بڕە پارەیەی لە هاووڵاتیان وەریدەگرن كە لەو بڕە، تەنیا 50 دینار بۆ بریکارەکە دەبێت، لە ئەگەری جێبەجێكردنی بڕیارە نوێیەكە، بریكارەكانی خۆراك بۆ هەر تاكێك، 250 دیناریان بۆ دەمێنێتەوە.