پسوولەی خۆراكی هەولێر: هێشتا زیادكردنی منداڵ، مامەڵەی هاوسەرگیری و گواستنەوەی بریكار بەردەست نین

ئاڤا نیوز

بەڕێوەبەری پسوولەی خۆراكی هەولێر ڕایدەگەیێنێت، سەرەڕای دەستپێكردنەوەی خزمەتگوزارییەكانی كارتی بەشەخۆراک، لە پارێزگاری هەولێر تەنیا خزمەتگوزاریی بلۆككردن، لابردنی بلۆک و سڕینەوەی ناوی مردوو بەردەستە، هێشتا زیادكردنی منداڵ، مامەڵەی هاوسەرگیری و گواستنەوەی بریكار كارا نەكراوەتەوە.

چیرۆکی سەرەکی: دوای ئەوەی خزمەتگوزارییەکانی سیستمی ئەلیکترۆنیی پسوولەی خۆراک، بەهۆی کێشەیەکی تەکنیکیەوە بۆ ماوەیەک لەسیستەمی پارەدانەکە ڕاگیرا، ڕۆژی پێنجشەممە، 12ـی شوباتی 2026، وەزارەتی بازرگانیی عێراق، دەستپێکردنەوەی کۆمەڵێک خزمەتگوزاریی گرنگی پەیوەست بە کارتی بەشەخۆراکی لە سەرجەم لقەکان ڕاگەیاند، کە دیارترینیان سڕینەوەی ناوی مردووان و ڕاگرتنی بەشەخۆراکە.

زانیاریی زیاتر: هاوکات لە هەنگاوێکی نوێدا، پڕۆسەی زیادکردنی ناوی منداڵانی خوار تەمەن 12 ساڵ لە ڕێگەی سیستەمی ئەلیکترۆنییەوە لە نۆ لق دەستی پێکرد، کە پارێزگاکانی دهۆک و هەڵەبجەش دەگرێتەوە.

لێدوانی فەرمی: سیامەند قادر، بەڕێوەبەری پسوولەی خۆراكی پارێزگای هەولێر بە ئاڤای ڕاگەیاند، ئێستا تەنیا خزمەتگوزارییەكانی بلۆککردن، لابردنی بلۆک و سڕینەوەی ناوی مردوو بەردەستە، بەڵام خزمەتگوزارییەکانی؛ زیادکردنی منداڵ و مامەڵەی هاوسەرگیری و گواستنەوەی بریکار هێشتا بەردەست نیە.

ئاماژەی بەوەشكرد، هەر جۆرە خزمەتگوزارییەكی دیكەش بكرێتەوە، لەڕێگەی سەكۆ فەرمییەكان و دەزگاكانی ڕاگەیاندن، هاووڵاتیانی لێ ئاگادار دەكەینەوە.