کارەبای سلێمانی: 93%ـی هاوبەشانی کارەبا بۆ مانگی یەک هەزار بۆ 100 هەزار دیناریان بۆ هاتووەتەوە

ئاڤا نیوز

بەڕێوەبەرایەتیی گشتیی کارەبای سلێمانی ڕوونکردنەوەیەک لەسەر نرخی کارەبای مانگێکی هاونیشتمانیان بڵاودەکاتەوە و تێیدا هاتووە: 93%ـی هاوبەشانی کارەبا لە سلێمانی لە هەزار بۆ 100 هەزار دیناریان بۆ هاتووەتەوە.

ڕاگەیێنراوی فەرمی: بەڕێوەبەرایەتیی گشتیی کارەبای سلێمانی ڕوونکردنەوەیەکی بڵاوکردەوە و ڕایدەگەیینێت: بەپێی ئامارەکانی کاروباری فرۆشتنی وزە لە سنووری بەڕێوەبەرایەتییەکانی دابەشكردنی كارەبای سلێمانی، ڕۆژهەڵات و ڕۆژئاوادا کە 362 هەزار و 745 هاوبەشی کارەبایان لە ماڵان، بازرگانی، میری، پیشەسازی و کشتوکاڵی هەیە. 93%ـی بڕی خەرجی کارەبایان بۆ مانگی یەك، لە ماوەی نێوان 20-12-2025 بۆ 20-01-2026، هەزار بۆ 100 هەزار دیناریان بۆ هاتووەتەوە. 

هەندێک هاوبەشیش بڕی پارەی زۆریان بۆ هاتووەتەوە لە سەروو ملیۆن دینار بۆ ملیار دینارە، ئەو شوێنانە کارگە گەورەکانی ئاسن، چیمەنتۆ، پیشەسازی و بازرگانی و مۆڵە گەورەکانن.

لەلایەکی دیکەوە: بەڕێوەبەرایەتیی گشتیی کارەبای سلێمانی داوا لە هاووڵاتیان دەکات، بۆ هەر پرسیار، تێبینی و روونکردنەوەیەک دەتوانن سبەی شەممە 14-02-2026، سەردانی بەڕێوبەرایەتیی دابەشكردنی سلێمانی - ڕۆژهەڵات لە گەڕەکی قاڵاوا بكەن، بۆ پێدانی ڕوونكردنەوەی پێویست، هاوکات خۆتۆماركردن لە سیستەمی (KYC) بۆ ئەوەی لەڕێگای مۆبایلەوە بری پارەی بەکارهاتووی بۆ بێتەوە.