ئیسرائیل هەوڵدەدات ناوچەیەکی دابڕێنەر لە غەزە دروست بکات

ئاڤا دیجیتاڵ

 

بەهۆی بەردەوامی شەڕەوە، ئیسرائیل دەیەوێت هەڕەشە و مەترسییەکانی "بزووتنەوەی حەماس" لەسەر ناوچە سنوورییەکانی خۆی کەمبکاتەوە، هەر بۆیەش لە مانگی 11ـی ساڵی ڕابردووەوە هەڵدەدات ناوچەیەکی دابڕێنەر لە باکووری غەزە دروستبکات. 

 

چیرۆکە سەرەکییەکە: فەرمان بە سەربازە ئیسرائیلییەکان کراوە ناوچەیەک بە پانیی یەک کیلۆمەتر لە سنووری باکووری غەزە لە هەموو شتێک پاک بکەنەوە، بەشێوەیەک پاکبکرێتەوە کە هیچ زیانێکی نەبێت. رۆژنامەی وۆڵ ستریت جۆرناڵی ئەمریکی، لە راپۆرتێکدا ئەمەی ئاشکرا کردووە. 

 

زانیاریی زیاتر: مەبەستی سەرەکیی ئیسرائیل لە پاککردنەوەی تەواوی ناوچە سنوورییەکە، دروستکردنی ناوچەیەکی ئارامە لەنێوان ئیسرائیل و غەزە کە فەڵەستینییەکان نەتوانن بچنە نێویەوە، ئەمەش دەبێتە هۆکارێک بۆ داماڵینی ناوچەکە لە هێزی چەکدار. بەهۆی هێرشی حەوتی ئۆکتۆبەری 2023ـەوە ئیسرائیلییە ئاوارەکان ئەو ناوچەیەیان بەجێهێشتووە و ناتوانن بگەڕێنەوە؛ بەدروستکردنی ئەو ناوچەیەش دەتوانن بۆ شوێنەکانیان لە نزیک سنوور بگەڕێنەوە.

 

لەلایەکی دیکەوە: بەرپرسانی ئەمریکا ناڕازیین و نیگەرانیی خۆیان بە ئیسرائیل گەیاندووە. ئەمریکا بە ئیسرائیلی گوتوە: "چۆڵکردنی ناوچە سنوورییەکان نیگەرانیی فەڵەستینییەکان بەرامبەر نیازی ئیسرائیل بۆ داگیرکردنی غەزە قووڵتر دەکاتەوە". ئەنتۆنی بلینکن، وەزیری دەرەوەی ئەمریکا ناڕەزایی بەرامبەر بە پلانەکە دەربڕیوە و جەختی لە یەکپارچەیی خاکی غەززە کردووەتەوە.