لە هەولێر 800 کەس نامەیەکی کراوە ئاراستەی سەرۆکوەزیران بارزانی دەکەن

ئاڤا نیوز

 

زیاتر لە 800 کاسبکاری بواری عەقارات لە نامەیەکی کراوەدا بۆ سەرۆکوەزیران مەسرور بارزانی، دەڵێن: "کۆمپانیایەکی عەقارات لە هەولێر زیاتر لە 35 ملیۆن دۆلاری لێ خواردوون"، داوا دەکەن "مافیان بۆ بگەڕێنێتەوە".

 

وێنە گەورەکە: لە نامەکەدا کە بە ناوی (ئەنجوومەنی مافخوراوان) وێنەیەکی بۆ ئاڤا نیوز نێردراوە، سەرەتای چیرۆکەکە باس کراوە و تێیدا هاتووە: "چەند مانگێک بەر لە ئێستا کۆمپانیای عەقارات باغی شەقڵاوە لە سیناریۆیەکی تەمومژاوی، زیاتر لە 35 ملیۆن دۆلاری کاسبکارانی بواری عەقارات و کڕیارانی یەکەکانی نیشتەجێبوونی خوارد".

 

زانیاریی زیاتر: وەک لە نامەکەدا خراوەتەڕوو: "بۆ پەردەپۆشکردن، دوو فەرمانبەری خۆیان بەگرتن داوە گوایە ئاگاداری وەرگرتنی پارە نەبوون. لە کاتێکدا پارەکە بە قۆناغبەندی و بەناوی وەبەرهێنانی هاوبەش و کڕینی یەکەی نیشتەجێبوون بە وەسڵ و مۆر وەرگیراوە".

 

گۆشەیەکی دیکە: لە نامەکەدا جەخت کراوەتەوە: "دۆکیۆمێنتە بەردەستەکان شایەتی ئاگاداربوونی بەڕێوەبەر و خاوەنانی باغی شەقڵاوەن کە سەرەڕای خواردنی پارەکە دەیان تۆمەتیش بۆ کاسبکار و خاوەن پارەکان دروست دەکەن".

 

مەترسییەکان پێشبینیکراوەکان: لە نامەکە جەخت لەوە کراوەتەوە، "سەرەڕای لەکەداربوونی کەرتی وەبەرهێنان لە هەرێمی کوردستان، مەترسی شڵەژانی بازاڕی پرۆژەکانی نیشتەجێبون هەیە کە سیمایەکی جوانی پێشکەوتنی هەولێرە".
 
داواکاری: کاسبکارەکان داوا لە سەرۆکوەزیران بارزانی دەکەن "ئەو ستەمە گەورەیە قبوڵ نەکەیت و دڵنیایین کە بەڕێزتان داکۆکیکاری هەق دەبن و ماف بۆ خاوەن مافەکان دەگەڕێننەوە".

ئاڤا نیوز بەدواداچوونی زیاتر بۆ بابەتەکە دەکات...