شۆفێرێک لە سلێمانی بە ئۆتۆمبێلێكی ژمارە ساختەوە چەندین سەرپێچی دەكات

ئاڤا نیوز

 

شۆفێرێک لە سلێمانی بۆ ماوەیەکی زۆر ژمارەی ساختەی کردووە بە ئۆتۆمبێلەکەیەوە و چەندین سەرپێچی کردووە،  گوتەبێژی هاتووچۆی سلێمانیش دەڵێت "سەرجەم سەرپێچییەکانی سەلمێنراون و سزا دەدرێت و دەدرێتە دادگەش".

چیرۆکی سەرەکی: شۆفێرێک لە سلێمانی بۆ ماوەیەکی زۆر ژمارەیەکی ساختەی بە ئۆتۆمبێلەکەیەوە کردبوو و بەدەر لەکاری نایاسایی و سەرپێچی یاساکانی هاتووچۆ، زۆرترین کات بە تیژڕەوی شۆفێریی کردووە و مەترسیی بۆ خۆی و شۆفێرانی دیکە دروستکردووە و سەرئەنجام دەستگیرکراوە.

لێدوانی فەرمی: بەهمەن عەبدوڵڵا، گوتەبێژی هاتووچۆی سلێمانی بۆ ئاڤا نیوز گوتی: ئێستا ئۆتۆمبێلی تۆمەتبارەکە دەستیبەسەردا گیراوە و سەرجەم ئەو سزایانەی لە ماوەی دوو ساڵدا ئەنجامی دابوون و بە بەڵگە لەسەری سەلمێنراوە، لە کۆی 58 سەرپێچی 56ـیان سەرپێچی تیژڕەویی بوون و بە بڕی شەش ملیۆن و 310 هەزار دیناری عێراقی سزادراوە.

زانیاریی زیاتر: "وەک بەڕێوەبەرایەتی هاتووچۆی سلێمانی سکاڵا دژی ئەم شۆفێرە تۆمار دەکرێت و دادگە بڕیاری دەستگیرکردنی دەردەکات". بەهمەن عەبدوڵڵا وای گوت.